BAKI ŞƏHƏR BAŞ POLİS İDARƏSİNİN MƏLUMATI
Xəbər verildiyi kimi, özlərini Birləşmiş Müxalifət Hərəkatı adlandıran quruma daxil olan Müsavat, AXCP (klassiklər) , Azərbaycan Demokrat, Vahid Azərbaycan Milli Birlik və Vahid Azərbaycan partiyalarının sədrləri 2002-ci il martın 23-də Bakının “Füzuli” meydanında mitinq keçirmək barədə şəhər İcra Hakimiyyətinə müraciət etmişlər.
“Füzuli” meydanında və onun ətrafında əhalinin istirahət etdiyi və sıx yaşadığı, həmçinin həmin ərazidə nəqliyyatın intensiv hərəkət etdiyi nəzərə alınaraq “Sərbəst toplaşmaq azadlığı haqqında” Azərbaycan Respublikası Qanununun tələbləri baxımından bu yer toplantı üçün məqsədəuyğun sayılmamış və Dövlət Film Fondunun (keçmiş “Qələbə” kinoteatrının) qarşısındakı, həmçinin Binəqədi rayonunun İdman Texniki-Təlim Kompleksindəki meydanlar təklif edilmişdir. Bu barədə mitinqin təşkilatçılarına rəsmi məlumat verilmişdir.
Lakin Bakı şəhər İcra Hakimiyyətinin təklif etdiyi yerlərdən təkidlə imtina edən aksiya təşkilatçıları mitinqi “Füzuli” meydanında keçirməkdə israrlı olduqlarını bildirmişlər. Bunu nəzərə alaraq, razılaşdırılmamış yerdə mitinq keçirilməsinin yolverilməzliyinə, ictimai qaydanın pozulmasına və baş verə biləcək iğtişaşlara görə Bakı şəhər İcra Hakimiyyəti və hüquq-mühafizə orqanları tərəfindən onlara Azərbaycan Respublikasının müvafiq qanunlarına uyğun olaraq rəsmi xəbərdarlıq edilmişdir.
Bununla belə, sözü gedən quruma daxil olan partiyaların xəbərdarlıqlardan nəticə çıxarmayan liderləri hər vəchlə “Füzuli” meydanında mitinq keçirəcəkləri barədə müxtəlif kütləvi informasiya vasitələrində məlumatlar yaymışlar.
Bakı şəhər polis qarnizonunun əməkdaşları bu qanunsuz aksiyanın qarşısının alınması, paytaxtda ictimai asayişin, vətəndaşların konstitusion hüquqlarının qorunması məqsədi ilə müvafiq tədbirlər həyata keçirmişlər.
Bu gün saat 16.00-dan başlayaraq, qanunsuz aksiyanın iştirakçıları 100-150 nəfərlik qruplarla bir neçə istiqamətdən “Füzuli” meydanına daxil olmağa cəhd göstərmişlər.
Bu hüquqazidd hərəkətlərin qarşısını alan polis əməkdaşlarının qanuni tələblərinə məhəl qoyulmamış, onlara qarşı fiziki təzyiqlər göstərilməklə xidməti vəzifələrini yerinə yetirən 15 əməkdaşın sağlamlığına qəsdən müxtəlif dərəcəli bədən xəsarətləri yetirilmişdir.
Niyyəti baş tutmayan müxalifətin təəssübkeşlərindən ibarət ayrı-ayrı qruplar şəhərin müxtəlif ictimai yerlərində asayişi, vətəndaşların istirahət hüquqlarını pozmuş, avtonəqliyyatın hərəkətinə əngəllər törətmişlər. Bütün bu qanunsuzluqlar paytaxt sakinlərinin haqlı narazılığına və hiddətinə səbəb olmuş, onlardan hüquqazidd əməllərinə son qoymaları tələb edilmişdir.
Özlərinin dediyinə görə, 26 müxalifət partiyasını birləşdirən və hərəkat adlandırılan qondarma qurumun qanunsuz kütləvi tədbir cəhdində cəmi min nəfərədək üzvü və təəssübkeşi iştirak etmişdir.
Bugünkü qanunsuz aksiyaya cəhd bir daha təsdiq etdi ki, onun təşkilatçılarının əsl niyyəti mitinq keçirmək deyil, paxtaxtda sabitliyi pozmaq, daxili işlər orqanları əməkdaşlarına təzyiqlər göstərmək və sonradan dünyaya guya Azərbaycanda demokratiyanın pozulması barədə car çəkməklə beynəlxalq təşkilatların diqqətini cəlb etmək, ölkəmizin imicinə, dövlətimizin milli maraqlarına qəsdən zərər yetirmək olmuşdur.
İctimai qaydanın kobud surətdə pozulması, xidməti vəzifələrini yerinə yetirən polis əməkdaşlarına müqavimət göstərilməsi və xəsarət yetirilməsi ilə müşayiət olunan qanunsuz hərəkətlərə görə 35 nəfər saxlanılmışdır.
Faktla bağlı təhqiqat aparılır.
Bölmənin digər xəbərləri
