Bakı Slavyan Universitetində “Vətəndaş cəmiyyətinin inkişafında təhsilin rolu” mövzusunda tədbir keçirilmişdir
Bakı, 31 oktyabr (AZƏRTAC). Azərbaycan Milli Qeyri-Hökumət Təşkilatları Forumu Azərbaycan Respublikasının Prezidenti yanında QHT-lərə Dövlət Dəstəyi Şurasının maliyyə dəstəyi ilə “QHT sektorunun inkişafı məqsədi ilə ictimai müzakirələrin təşkili” layihəsini həyata keçirir.
AZƏRTAC xəbər verir ki, layihə çərçivəsində oktyabrın 31-də Bakı Slavyan Universitetində “Vətəndaş cəmiyyətinin inkişafında təhsilin rolu” mövzusunda tədbir keçirilmişdir.
QHT nümayəndələrinin, universitetin müəllim və tələbə heyətinin iştirak etdiyi tədbirdə BSU-nun tərbiyə işləri üzrə prorektoru Oqtay Səmədov MQF-nin həyata keçirdiyi layihələrin əhəmiyyəti haqqında danışmışdır.
MQF-nin prezidenti Rauf Zeyni “QHT sektorunun inkişafı məqsədi ilə ictimai müzakirələrin təşkili” layihəsi haqqında məlumat vermişdir. Vətəndaş cəmiyyətinin inkişafında təhsilin rolunu xüsusi vurğulayan R.Zeyni qeyd etmişdir ki, savadlı vətəndaş həm də güclü vətəndaş cəmiyyəti, güclü dövlət deməkdir.
Gənclər üçün Təhsil Mərkəzinin sədri Fəxrəddin Həsənzadə ölkəmizdə təhsilin inkişafı ilə bağlı qəbul edilən dövlət proqramlarının, bu sahədə həyata keçirilən islahatların önəmi haqqında danışmışdır.
Digər QHT rəhbərləri də Azərbaycanda təhsilin inkişafından, mövcud problemlərdən danışmış, belə tədbirlərin keçirilməsinin vacibliyini bildirmişlər.
Bölmənin digər xəbərləri
