BAKIDA 12 YAŞADƏK UŞAQLAR ARASINDA BEYNƏLXALQ ŞAHMAT TURNİRİ BAŞLANMIŞDIR
AZƏRTAC xəbər verir ki, noyabrın 1-də Bakıdakı “Ambassador” hotelində uşaqlar arasında I beynəlxalq şahmat turniri başlanmışdır.
Beynəlxalq turnir “Hewlett Packard” şirkətinin Azərbaycan nümayəndəliyinin və “Makkabi-Azərbaycan” mədəni-idman cəmiyyətinin təşkilatçılığı ilə 12 yaşadək uşaqlar arasında keçirilir.
Turnirin açılış mərasimində Gənclər və İdman Nazirliyinin, İsrail səfirliyinin və digər təşkilatların nümayəndələri iştirak etmişlər.
Yarışda Azərbaycan, Hindistan, Rusiya, Türkiyə, Gürcüstan, ABŞ, Pakistan və İsraildən 36 gənc şahmatçı mübarizə aparır. Yarışların baş hakimi beynəlxalq dərəcəli hakim Ülkər Umudovadır. Noyabrın 6-da başa çatacaq turnir 7 turdan ibarətdir.
Qaliblər HP şirkətinin istehsalı olan noutbukla (I yer), rəqəmsal fotoaparatla (II yer) və mobil telefonla (III yer) mükafatlandırılacaqlar.
Turnirdə ən yüksək yer tutan Azərbaycan şahmatçısı “Makkabi-Azərbaycan” mədəni-idman cəmiyyəti nümayəndə heyətinin tərkibində “Makkabi-Bolqarıstan”ın dəvəti ilə Bolqarıstana səfər edəcəkdir.
Bölmənin digər xəbərləri
