Obyektdə Heydər Əliyevə məlumat verildi ki, “Ferko” şirkəti nəinki Türkiyədə, habelə bir çox xarici ölkələrdə möhtəşəm binalar inşa etmişdir. Bu şirkət Bakıda tikintisinə başladığı diplomatik kompleksi 8 aya başa çatdırmaq niyyətindədir. Tikinti materiallarının əsas hissəsi Türkiyədən gətiriləcəkdir. Dost ölkədən obyektin tikintisinə 30 nəfər yüksək təcrübəli inşaatçı gəlmişdir. Gələcəkdə onların sayı artacaqdır.

Bu kompleks əsasən xarici ölkələrin dövlət başçılarını, yüksək vəzifəli şəxslərini qəbul edəcək. Burada qonaqların yaşaması, istirahəti üçün hər cür şərait yaradılacaqdır. Kompleksin bir neçə böyük iclas salonu, restoranları və digər xidmət obyektləri olacaqdır.

Tikintinin ümumi smeta dəyəri 27 milyon dollardır. Bütün xərcləri Türkiyə tərəfi, o cümlədən “Ferko” şirkəti çəkəcəkdir. Kompleks üçün lazım olan avadanlıq, mebel dəstləri və s. Türkiyədən gətiriləcəkdir. Bakı Baş Tikinti İdarəsi obyekti maşın və mexanizmlərlə, bir sıra inşaat materialları və işçi qüvvəsi ilə təmin edəcəkdir. Burada 200 türkiyəli, 200 azərbaycanlı inşaatçı çalışacaqdır.

Obyektin inşasına dörd il bundan əvvəl başlanıb. Tbilisi prospektindəki İdman-Konsert Kompleksinin yaxınlığında yerləşən böyük təpəlik güclü texnikanın köməyi ilə qısa müddətdə qaydaya salınmış, inşaat işləri üçün buraya xeyli material və avadanlıq gətirilmişdir. Tikinti meydançasında səliqə-sahman yaradılmasına da xüsusi fikir verilmişdir.

Azərbaycan Prezidenti Heydər Əliyevin obyektin tikintisinə gəlməsi ilə əlaqədar burada görüş keçirildi. Respublikanın xarici işlər naziri Həsən Həsənov toplaşanları salamlayaraq bildirdi ki, çox böyük əhəmiyyəti olan bu obyektin tikintisi iki ölkə arasında dostluq və qardaşlıq münasibətlərinin yeni təzahürüdür.

Türkiyə Respublikasının Azərbaycandakı səfiri Altan Karamanoğlu görüşdə çıxış edərək “Ferko” şirkətinin fəaliyyətindən bəhs etdi, bu mühüm işin başlanmasını xalqlarımız arasında əlaqələrin daha da möhkəmləndirilməsinin bariz nümunəsi kimi qiymətləndirdi.

Azərbaycan Respublikasının Prezidenti Heydər Əliyev görüşdə çıxış etdi.

Görüşdə Türkiyənin “Ferko” İnşaat, Turizm, Sənaye və Ticarət Şirkətinin prezidenti Fərid Merictən də çıxış etdi.

Sonra Azərbaycan Prezidenti, içində özünün xatirə müraciəti olan kapsulu diplomatik kompleks binasının bünövrəsinə qoydu və onun üstünə beton məhlulu tökdü. Daha sonra Heydər Əliyev “Ferko” şirkətinin inşaatçıları ilə görüşdü, onları bu mühüm işə başlamaları münasibətilə təbrik etdi.

Görüşdə respublika Ali Sovetinin sədri Rəsul Quliyev, dövlət müşavirləri Arif Rəhimzadə, Qabil Hüseynli, Baş nazirin müavini, iqtisadiyyat naziri Səməd Sadıxov, Bakı şəhər icra hakimiyyətinin başçısı Rəfael Allahverdiyev iştirak edirdilər.

Aslan Aslanov

AZƏRTAC-ın müxbiri