Bakıda dövlət qurumlarının rəhbərləri üçün yüksəksəviyyəli “AI Leadership” təlimi keçirilir
Bakı, 17 dekabr, AZƏRTAC
Bakıda AZCON Holding şirkətlərindən olan Milli Süni İntellekt Mərkəzi Rəqəmsal İnkişaf və Nəqliyyat Nazirliyinin dəstəyi ilə bir sıra dövlət qurumlarının rəhbər şəxsləri üçün yüksəksəviyyəli “Artificial Intelligence (AI) Leadership” adlı təlim həyata keçirir.
Milli Süni İntellekt Mərkəzindən AZƏRTAC-a bildirilib ki, “Stanford Engineering Center for Global & Online Education”in rəhbəri Karissa Little təlimin açılışında çıxış edərək dövlət idarəçiliyində qərarvermə proseslərinin gücləndirilməsi, eləcə də süni intellektin məsuliyyətli tətbiqinə rəhbərlik edilməsi baxımından süni intellektə əsaslanan liderliyin əhəmiyyətini vurğulayıb.
“Texnoloji imkanlarla yanaşı, insan kapitalının inkişafı süni intellektin tətbiqi ilə bağlı uzunmüddətli transformasiyanın əsas sütunlarından biridir”, - deyə AZCON Holdingin icraçı direktorunun müşaviri Aysel Soltanova qeyd edib. O, idarəetmədə liderliyin inkişafına yönəlmiş təşəbbüslərin dövlət institutlarına süni intellekt texnologiyalarını məsuliyyətli və effektiv şəkildə tətbiq etmək imkanı verdiyini vurğulayıb.
“Stanford Engineering Center for Global & Online Education” tərəfindən həyata keçirilən və iki gün davam edəcək təlimin məqsədi dövlət idarəçiliyində süni intellekt texnologiyalarının tətbiqi üzrə strateji biliklərin artırılması, məlumatyönümlü qərarvermə praktikasının gücləndirilməsi və ölkənin innovasiya ekosisteminin inkişafına institusional dəstəyin genişləndirilməsidir.
Təlim müddətində iştirakçılar süni intellektin idarəetmə proseslərində rolu, tətbiq sahələri, potensial transformasiya imkanları və risklərin idarə olunması ilə bağlı qabaqcıl beynəlxalq yanaşmalarla tanış olurlar.
Bakıya səfər edən Stanford təlimçiləri tədrisi üç əsas strateji istiqamət üzrə – süni intellekt ekosistemi, süni intellektlə güclənən təşkilatlar və təsir üçün süni intellekt innovasiyası mövzularında aparırlar.
Proqramı uğurla başa vuran iştirakçılara “Stanford Engineering Center for Global & Online Education” tərəfindən sertifikatlar təqdim olunacaq.
AZCON Holding şirkətlərindən olan Milli Süni İntellekt Mərkəzi Azərbaycanın süni intellekt sahəsində institusional liderliyini gücləndirmək məqsədilə yüksəkixtisaslı kadr hazırlığı, innovativ süni intellekt həllərinin inkişafı və milli əhəmiyyətli tədqiqatların aparılması istiqamətində fəaliyyət göstərir. Mərkəz dövlət qurumları, sənaye və beynəlxalq tərəfdaşlarla əməkdaşlıq edərək ölkənin süni intellekt potensialının inkişafına dəstək verir.
Bölmənin digər xəbərləri
