BAKIDA KƏND TƏSƏRRÜFATI MƏHSULLARININ NÖVBƏTİ SATIŞ-YARMARKALARI KEÇİRİLMİŞDİR
 |
 |
Nəsimi rayonunda yerləşən “Təzə bazar” MMC-nin həyətindəki yarmarkada alıcılara Sabirabad, Salyan, Gədəbəy, Tovuz, Hacıqabul və digər rayonlardan gətirilmiş kənd təsərrüfatı məhsulları təklif olunurdu. Kənd Təsərrüfatı Nazirliyinin mətbuat xidmətinin rəhbəri Murtuzəli Hacıyev bildirdi ki, bazar günü əhaliyə 23,3 ton məhsul, o cümlədən 3 ton ət, 11 ton tərəvəz, 5 ton kartof, 4 ton meyvə, 0,2 ton süd məhsulları, 0,1 ton bal, 10 min yumurta satılmışdır. Yarmarkadakı qiymətlər bazarlardan 20-30 faiz aşağı olmuşdur.
Metronun “Əhmədli” stansiyasının yaxınlığında, Sarayevo küçəsində, “Bakı” kiçik müəssisəsinin “Azər” ticarət mərkəzində Şəmkir, Salyan, Quba, Kürdəmir, Biləsuvar, Qəbələ, Ağcabədi, Qax və Şəki rayonlarından gətirilən məhsulların çeşidinin çoxluğu diqqəti cəlb edirdi. İşçi qrupunun qərargahından verilən məlumata görə, şənbə və bazar günlərində burada əhaliyə 1,3 ton ağartı, 57 ton meyvə, 84, 2 ton tərəvəz, 16, 5 ton ət, min ədəd yumurta və digər məhsullar satılmışdır. Yarmarkada alma, nar, kartof, soğan, ət, konserv, bal və s. üstünlük təşkil edirdi.
Yarmarkada ət və süd məhsulları müayinədən keçirildikdən sonra onların satışına icazə verilirdi.
Binəqədi rayonu ərazisində 6 nömrəli Bakı Texniki Peşə Liseyinin qarşısındakı yarmarkada əhaliyə Bərdə, Goranboy və Ağstafa rayonlarının fermerləri 29 tondan artıq keyfiyyətli meyvə-tərəvəz və heyvandarlıq məhsulları satırdılar. Alıcılar həmin məhsulların qiymətlərinin onlar üçün əlverişli olduğunu bildirirdilər. Burada müvafiq qurumların nümayəndələri məhsulların qiymətlərinə ciddi nəzarət edirdilər.
Biləcəri qəsəbəsi, Məlik Aslanov küçəsi, 284 nömrəli orta məktəbin qarşısındakı yarmarkada satışa kartof, kələm, kök, üzüm, pomidor, bibər, xiyar, alma və digər kənd təsərrüfatı məhsulları çıxarılmışdı. Həmin məhsullar şəhər sakinlərinə ucuz qiymətlərlə təklif edilirdi. Kənd Təsərrüfatı Nazirliyinin nümayəndəsi Qalib Hacızadə bildirmişdir ki, Qazax və Ağsu rayonlarının fermerləri yarmarkaya, ümumilikdə, 26 tondan çox məhsul gətiriblər.
Kənd Təsərrüfatı Nazirliyinin nümayəndəsi Məmməd Həziyevin sözlərinə görə, Səbail rayonunun Badamdar qəsəbəsindəki yarmarkada Ağdaş, Salyan, Saatlı fermerləri tərəfindən şənbə və bazar günləri satışa 30 tona yaxın müxtəlif çeşidli kənd təsərrüfatı məhsulları çıxarılmışdır. Burada da qiymətlər bazardakından xeyli ucuz olmuşdur.
Nərimanov rayonundakı Keşlə ticarət mərkəzində təşkil olunmuş yarmarkada paytaxt sakinlərinə Xaçmaz, İmişli, Oğuz, Qobustan, Tovuz, Astara və Salyan rayonlarından gətirilmiş 4,3 ton ət, 1,3 ton ağartı, 51,3 ton tərəvəz, 18 ton kartof, 4 ton bostan məhsulları, 27,9 ton meyvə, 300 kiloqram konserv təklif edilmişdir. Yarmarkada səliqə-səhmana və qiymətlərə nəzarət olunurdu.
Bölmənin digər xəbərləri
