BAKIDA KƏND TƏSƏRRÜFATI MƏHSULLARININ NÖVBƏTİ SATIŞ-YARMARKALARI TƏŞKİL OLUNMUŞDUR
AZƏRTAC xəbər verir ki, iyulun 5-də Bakı şəhərinin rayonlarında əvvəlcədən müəyyən olunmuş yerlərdə kənd təsərrüfatı məhsullarının növbəti satış-yarmarkaları keçirilmişdir. Şəhər əhalisinin kənd təsərrüfatı məhsullarına tələbatını ödəmək məqsədi ilə təşkil olunan yarmarkalara, mövsümə uyğun olaraq, əsasən meyvə-tərəvəz və bostan məhsulları çıxarılmışdı.
“Təzə bazar” MMC-nin həyətindəki yarmarkaya Sabirabad, Zərdab, Gədəbəy, Hacıqabul və digər rayonlardan müxtəlif çeşidli kənd təsərrüfatı məhsulları gətirilmişdi.
Kənd Təsərrüfatı Nazirliyinin nümayəndəsi Fərhad Qəmbərov satışa 22,27 ton məhsul, o cümlədən 2 ton ət, 0,2 ton ağartı, 7 ton tərəvəz, 4 ton kartof, 2 ton bostan məhsulları, 7 ton meyvə, 13 min ədəd yumurta, 70 kiloqram bal çıxarıldığını bildirmişdir. Yarmarkada qiymətlər bazardakından 20-25 faiz aşağı olmuşdur.
Burada qoyun ətinin kiloqramı 4 manat 50, mal əti 4 manat 20 qəpiyə, quş əti 3 manat 80-4 manat 20 qəpiyə, bal 9-10 manata, gilas, gilənar 1 manat 20 qəpik-2 manata, ərik 1 manat 50 qəpiyə, alma 50 qəpik-1 manata, armud 40 qəpik-1 manata, xiyar 50 qəpik-1 manata, çuğundur, yerkökü, kələm 60, badımcan 50, pomidor, lobya 40-50, kartof, soğan 30-40, qarpız 20, yemiş 50-60, yumurtanın bir ədədi 10, göyərtinin dəstəsi 10-15 qəpiyə satılırdı.
Metronun “Əhmədli” stansiyasının yaxınlığında, Sarayevo küçəsində, “Bakı” kinoteatrının yanında “Bülbülə” kiçik müəssisəsinin “Azər” ticarət mərkəzində təşkil olunmuş yarmarkada əhaliyə müxtəlif çeşiddə bol məhsul, o cümlədən lobya, kələm, xiyar, badımcan, qarpız, kartof təklif olunurdu. Burada meyvə-tərəvəzin və heyvandarlıq məhsullarının qiymətləri ucuz olduğuna görə alıcılar həvəslə bazarlıq edirdilər.
Kənd Təsərrüfatı Nazirliyinin nümayəndəsi Namiq Qüdrətov bildirdi ki, Salyan, Kürdəmir, Quba, Şəmkir, Qəbələ, Ağcabədi, Biləsuvar və digər rayonların fermerləri satışa 264,3 ton məhsul çıxarmışlar.
A.Şərifzadə küçəsi, 194, metronun “İnşaatçılar” stansiyasının 200 metrliyində təşkil olunmuş yarmarkada Salyan, Qusar, Dəvəçi, Oğuz və digər rayonların fermerləri paytaxt sakinlərinə 51 tondan çox müxtəlif çeşidli kənd təsərrüfatı məhsulu təklif edirdilər. Onlar yetişdirdikləri meyvə-tərəvəzi bazardakından xeyli ucuz qiymətə satırdılar.
Kənd Təsərrüfatı Nazirliyinin və Yasamal Rayon İcra Hakimiyyətinin nümayəndələri satışa nəzarət edir, alıcıların arzu və təkliflərini dinləyirdilər.
Yarmarkada kartofun kiloqramı 30-40, pomidor 40-50, badımcan 50 qəpiyə, gilas 1 manat 50 qəpik-2 manata, mal əti 4 manat 50 qəpiyə, qoyun əti 5 manata, yumurtanın ədədi 10 qəpiyə, quş əti isə 3 manat 80 qəpiyə təklif edilirdi.
Badamdar qəsəbəsinin mərkəzində 9, 7 və 5 mərtəbəli binaların həyətində, 239 nömrəli məktəbin yaxınlığındakı yarmarkada Ağdaş, Salyan və digər rayonlardan gətirilmiş 13 tondan çox məhsul satılırdı.
Agdaşlı Bahadur Bayramov gətirdiyi gilasın kiloqramını 1 manat 50 qəpiyə təklif edirdi. O bildirdi ki, indiyədək bir neçə yarmarkada iştirak etmiş və 2 tondan çox məhsul satmışdır.
Kənd Təsərrüfatı Nazirliyinin nümayəndəsi Məmməd Həziyev yarmarkaların bazarda qiymətlərin aşağı düşməsinə birbaşa təsir göstərdiyini vurğuladı.
Suraxanıda “Günəş” ticarət mərkəzindəki yarmarkada Balakən, Qobustan, Samux, Daşkəsən, Quba və Biləsuvar rayonlarının fermerləri satışa 35 tondan çox məhsul çıxarmışdılar.
Kənd Təsərrüfatı Nazirliyinin nümayəndəsi Mustafa Rüstəmovun sözlərinə görə yarmarkada satılan məhsulların qiyməti bazardakından 20-35 faiz ucuzdur. Satışda meyvə-tərəvəz, ət-süd məmulatları, konservləşdirilmiş məhsullar vardır. Alıcılar məhsulun qiymətindən və keyfiyyətindən razıdırlar.
“Suraxanı Maşınqayırma Zavodu” Açıq Törəmə Səhmdar Cəmiyyətinin ərazisindəki yarmarkada isə Cəlilabad rayonunun fermerleri alıcılara bazardakından 20-25 faiz ucuz qiymətlərə 5 tondan çox məhsul təklif edirdilər.
Biləcəri qəsəbəsi, Məlik Aslanov küçəsində yerləşən 284 nömrəli orta məktəbin qarşısında təşkil olunmuş yarmarkaya Qazaxdan 14,5, Ağsudan 11 ton təzə pomidor, kələm, badımcan, xiyar, qarpız, digər meyvə-tərəvəz və süd məhsulları gətirilmişdi.
Binəqədi rayonundakı 6 nömrəli Bakı Texniki Peşə Liseyinin qarşısında təşkil olunmuş yarmarkada Goranboy, Bərdə və Ağstafa fermerləri keyfiyyətli kənd təsərrüfatı məhsulları satırdılar. Burada meyvə-tərəvəzin alıcısı daha çox idi.
İşçi qrupunun rəhbəri Qadir Həsənov bildirdi ki, yarmarkada satışa 14 tondan artıq məhsul çıxarılmışdır.
######
Bölmənin digər xəbərləri
