BAKIDA XI BEYNƏLXALQ XƏZƏR ŞER AXŞAMLARI KEÇİRİLİR
AZƏRTAC-ın müxbiri xəbər verir ki, aprelin 9-da Bakı Dövlət Universitetində tədbirin rəsmi açılış mərasimi olmuşdur. Rektor, AMEA-nın müxbir üzvü Abel Məhərrəmov qonaqları salamlayaraq, onlara uğurlar arzuladıqdan sonra sözü qələm sahiblərinə vermişdir.
Azərbaycan Yazıçılar Birliyinin sədri Anar, şairlər Qabil, Yavuz Bülent, Bəkir Sıtkı, Abbas Abdulla,“Türk ədəbiyyatı” jurnalının baş redaktoru İsa Kocakaplan, tənqidçi-ədəbiyyatşünas Əsəd Cahangir çıxış etmişlər. Qeyd olunmuşdur ki, indiyədək bu şer axşamı Türkiyədə Xəzər dənizinin kiçik miqyaslı təkrarı olan Xəzər gölünün sahilində keçirilmişdir. Natiqlər türk şerinin dünəni və bu günündən söz açmış, mövcud problemləri sadalamışlar. Təəssüflə qeyd olunmuşdur ki, türk xalqları arasında süni olaraq əlifba fərqi, dil fərqi yaradılmışdır. Odur ki, eyni soykökdən olan şairlər indi bir-birinin əsərlərini tərcümədə oxumağa məcburdurlar. Ona görə də ortaq dilə böyük ehtiyac var. Türk dilində qarşılığı olan sözlərin belə yerli-yersiz Avropa dillərindən alınma sözlərlə əvəz olunması zərərli meyl kimi qiymətləndirilmişdir. Xüsusi vurğulanmışdır ki, əlifba birliyi dil birliyi, dil birliyi fikir birliyi, fikir birliyi iş birliyi deməkdir. Türk xalqlarının isə bu gün qloballaşan dünyada fikir və iş birliyinə daha çox ehtiyacı vardır.
Beynəlxalq Xəzər şer axşamının bədii hissəsi aprelin 10-da Azərbaycan Dövlət Musiqili Komediya Teatrında olacaqdır.
Bölmənin digər xəbərləri
