BAKILI JURNALİSTLƏRİN MOSKVA GÖRÜŞLƏRİ
Elə bu günlərdə Azərbaycan kütləvi informasiya vasitələrinin bir qrup nümayəndəsi Rusiya Beynəlxalq İnformasiya Agentliyi - “RİA-Novosti”nin təşkil etdiyi Moskva səfərindən zəngin təəssüratla qayıtmışdır. Lütfkar ev sahibləri, bu agentliyin MDB və Baltikyanı ölkələr üzrə Baş direktorluğundakı həmkarlarımız - məsul redaktor Valeriya Panina, direktorun müavinləri Ella Taranova və Valeri Yenin, eləcə də direktor Alan Kasayev və şöbə rəisi Aleksandr Altman Moskva torpağında səfərdə olduğumuz altı gün ərzində bizim qayğımızı çəkir, nəzərdə tutduqları proqramın həyata keçirilməsi üçün əllərindən gələni edirdilər.
Proqram isə çox dolğun idi və yaxşı düşünülmüşdü. Səfərin birinci günü “RİA-Novosti” agentliyi ilə tanışlıqla və onun mətbuat klubunda Rusiya Federasiyası Dövlət Dumasının MDB işləri üzrə Komitəsi sədrinin birinci müavini Əhməd Bilalovla görüşlə başladı. Qısa giriş sözündə onun toxunduğu mövzuların dairəsi isə geniş idi. Buna görə verilən suallar da ölkələrimizin həyatının ən müxtəlif cəhətlərini əhatə edirdi: əsası hələ böyük lider Heydər Əliyev tərəfindən qoyulmuş və dövlət başçıları İlham Əliyevin və Vladimir Putinin səyləri ilə bütün sahələrdə ilbəil möhkəmlənən ikitərəfli münasibətlərdən, bizim ən ağrılı problemimiz olan Dağlıq Qarabağ münaqişəsindən tutmuş bir çox başqa məsələlərə, təəssüf ki, Rusiyada əcnəbilərə mövcud nifrət təzahürləri məsələlərinə qədər. Sonuncu bizim üçün – tarixin bütün dövrlərində dünyada, yəqin, ən tolerant ölkənin vətəndaşları üçün əsla qəbuledilməzdir. Yeri gəlmişkən, bütün bu məsələlər başqa görüşlərdə də söhbətlərimizin mövzusuna çevrilirdi.
Bizi Kremldə Rusiya Prezidentinin xarici siyasət məsələləri üzrə köməkçisi Sergey Prixodko, Xarici İşlər Nazirliyində isə MDB Departamentinin başçısı Andrey Kelin qəbul etdi, “İzvestiya”nın baş redaktoru Vladimir Mamontovun qonağı olduq. Mən “İzvestiya”nı doğma qəzetim sayıram, çünki 15 ildən artıq bir müddətdə onu Azərbaycanda təmsil etmişəm. “Exo Moskvı” radiostansiyasına getdik, onun baş redaktoru, çox qeyri-adi və maraqlı şəxsiyyətlə - Aleksey Venediktovla tanış olduq. Rusiyanın Avropa hissəsi müsəlmanlarının Dini İdarəsində sanki nur saçan insanla - müfti Ravil Qaynutdinlə görüşümüzün xüsusilə yüksək əhval-ruhiyyədə keçdiyini vurğulamaq istəyirəm. Onun dilindən belə bir sadə həqiqət bir daha səsləndi ki, yalnız mərhəmətə və şəfqətə çağıran səs ədalətlidir.
Bütün bu görüşlər, söhbətlər, fikir mübadiləsi bir daha təsdiqləyir ki, Azərbaycan beynəlxalq aləmdə layiqli yerini tutmuşdur, onun mövqeləri möhkəmdir, şimaldakı böyük qonşumuz Rusiya ölkəmizlə dostluq və əməkdaşlıq münasibətlərində maraqlıdır və bu, əlbəttə, bizim üçün də çox vacibdir.
Qeyd etmək xoşdur ki, bakılı jurnalistlərin sualları onların ümumi, kifayət qədər yüksək təfəkkür səviyyəsindən, erudisiyasından, zənnimcə, ən başlıcası isə ölkəmizdəki vəziyyətə, onun problemləri və qayğılarına, dünyadakı mövqeyinə, xalqın rifahı naminə inkişafın hansı istiqamətdə gedəcəyini görmə qabiliyyətinə dərindən bələd olmalarından xəbər verirdi. AzTV-1-in “Den” proqramını təmsil edən Lilya Yusupova, “Obozrevatel” qəzetinin redaktoru, və yeri gəlmişkən, səfərimizin təşkilatçısı Gülnarə Məmmədzadə, ANS şirkətlər qrupunun vitse-prezidenti Seyfulla Mustafayev, Azərbaycan Prezidenti İcra Aparatının ictimai-siyasi məsələlər şöbəsinin bölmə müdiri Vüqar Əliyev, “Turan” informasiya agentliyinin başçısı Mehman Əliyev, İctimai Televiziyanın milli azlıqlar üçün Proqramlar Departamentinin direktoru Rauf Rəcəbov, “Exo” qəzeti redaktorunun müavini Nair Əliyev, Azərpress agentliyinin direktoru Elçin Abdullayev, İnternyus agentliyinin direktoru İlham Səfərov, “Novoye vremya” qəzetinin redaktoru Şakir Əliyev məhz bunu nümayiş etdirdilər.
Əlbəttə, heç də bütün görüşlər xoş ovqat doğurmurdu. Məsələn, “Moskovskiye novosti” qəzetinin baş redaktoru Vitali Tretyakovun, - bundan əvvəl o, “Nezavisimaya qazeta”ya başçılıq etmişdir, - iş otağını dilxor vəziyyətdə tərk etdik. Nə özünə, nə də bizə bəlli olmayan Böyük Rusiya yaradılması mövzusunda söhbət salan və layiqli cavab alan V.Tretyakov Ermənistan-Azərbaycan, Dağlıq Qarabağ münaqişəsinə dair bütün suallardan yayındı. Axı, Yerevandakı Rusiya-Ermənistan Dövlət Universitetinin fəxri professorundan bundan artıq daha nə gözləmək olardı. Özü də bu, onun Beynəlxalq Antiterror Media Forumuna prezidentlik etməsi ilə bir araya sığırmı?!
Lakin bu, çox kiçik və dərhal da unudulub gedən bir məqam idi...
Təbii ki, hər bir işgüzar səfərdə olduğu kimi, bizə də xoş istirahət anları nəsib oldu. Ev sahibləri bu məqamı unutmamış və öz qonaqlarına Rusiyanın Almaz Fonduna getmək və “Gözəllik”dən kam almaq, axşam isə məşhur Aleksandr Abdulovun quruluşunda “Qu quşunun yuvası üzərindən uçarkən” tamaşasına baxmaq imkanı yaratmışdılar. Yeri gəlmişkən, A.Abdulov Ken Kizinin bu məşhur əsərində baş rolu özü oynayırdı. Tamaşadan sonra ümumi razılıq əsasında xalqımızın da, dəfələrlə çıxış etdiyi paytaxtımızın da böyük dostu olan sevimli aktyorla kiçik, lakin dolğun söhbətimiz baş tutdu.
Ən nəhayət, Moskvadakı səfirliyimiz, ilk növbədə, səfir Polad Bülbüloğlu tərəfindən əməlli-başlı əzizləndik və diqqətlə əhatə olunduq. Səfirlə söhbətimiz gecə yarıdan xeyli keçənədək davam etdi. Səfər başa çatanda, Bakıya uçmaq ərəfəsində P.Bülbüloğlunun dəvəti ilə səfirliyimizin milli bayramımız – Respublika Günü münasibətilə “Mariott” hotelində keçirdiyi təntənəli qəbulda iştirak etdik. Rusiya dövlətinin rəsmi nümayəndələri, xarici ölkələrin buradakı səfirləri, mədəniyyət xadimləri ilə yanaşı, Moskvada yaşayıb işləyən və Azərbaycanın haqlı olaraq, fəxr etdiyi məşhur həmvətənlərimiz də qəbulda idilər.
Bu, ümumi bayram idi, xəyallar burada iştirak edən hər birimizi özümüzdən asılı olmayaraq, gələcəyə apardı və bir daha əmin olduq ki, insanlar həmişə bir yerdə mehriban dostluq və sülh şəraitində yaşaya, necə deyərlər, ən mümkünsüz məsələlər barədə razılığa gələ bilərlər. Hər halda, buna inanmaq, ümid bəsləmək lazımdır...
Dərindən hörmət bəslədiyim Anarın bir vaxt dediyi kimi, ümidlər dövrü ən yaxşı dövrdir. Ən yaxşı və əbədi. Çünki ümidlər doğrulanda, ümidlər dövrü başa çatmamalıdır. Gerçəkləşmiş hər bir ümid həm də yenilərinin doğulması deməkdir.
Bölmənin digər xəbərləri
