Balakənli fermerlər bu il 2 min hektara yaxın sahədə tərəvəz yetişdirəcəklər
Balakən, 2 mart, Mustafa Dadaşov, AZƏRTAC
Cari ildə Balakən rayonunun təsərrüfatlarında 2 min hektara yaxın sahədə tərəvəz əkini proqnozlaşdırılır. Əvvəlki illərdə olduğu kimi, balakənli fermerlər bu il də faraş tərəvəz əkininə, əsasən də istixana şəraitində faraş xiyar yetişdirilməsinə böyük maraq göstərirlər. Artıq tərəvəz şitillərinin istixanalarda torpağa köçürülməsinə başlanılıb. İstehsalçılar aprelin ortalarından başlayaraq bazara ilk məhsullarını çıxaracaqlar.
Bu barədə AZƏRTAC-ın bölgə müxbirinə rayon kənd təsərrüfatı idarəsindən məlumat verilib.
Tərəvəzçilik Balakən rayonunda kənd əhalisinin əsas gəlir mənbələrindən biri hesab olunur. Ötən il balakənli fermerlər 1888 hektar tərəvəz sahəsindən 24 min 115 ton məhsul götürüblər. Tərəvəz istehsalı əvvəlki illə müqayisədə 363 ton artıb. Rayon Statistika İdarəsindən verilən məlumata görə, 2017-ci ildə məhsul istehsalçıları istixana şəraitində 349 hektar sahədə tərəvəz yetişdiriblər. Mövsüm ərzində istixanalardan 5 min 17 ton xiyar, 2 min 692 ton pomidor tədarük olunub.
Hazırda təsərrüfatlarda yaz-tarla işlərinə hazırlıq görülür. Tezliklə kartof, qarğıdalı və digər yazlıq bitkilərin əkininə başlanılacaq.
Bölmənin digər xəbərləri
