Fatih Birol: Neft qiymətlərində davamlı eniş müşahidə edə bilərik
Bakı, 18 iyun, AZƏRTAC
İran-ABŞ sülh prosesi mövcud şəkildə davam edərsə, neft ucuzlaşa bilər.
AZƏRTAC xarici mediaya istinadla xəbər verir ki, bunu Beynəlxalq Enerji Agentliyinin icraçı direktoru Fatih Birol deyib.
“Qarşıda 60 günlük danışıqlar dövrü var və bu dövrün necə keçəcəyi də bundan asılıdır. Əgər Hörmüz boğazı qeyd-şərtsiz və problemsiz şəkildə nəqliyyata açılsa və fevralın 27-dəki vəziyyətə qayıtsaq, qiymətlərdə aşağı təzyiq görə bilərik. Tələbatın zəif olduğunu və istehsalın sürətlə artacağını gözləyirik. Əgər Hörmüz boğazı iyun ayının sonuna qədər açılmasa, dünya iqtisadiyyatı çox çətin bir dövrə qədəm qoyacaq. Çünki ölkələrin neft ehtiyatları tədricən azalmağa başlayıb və iyul-avqust ayları dünyanın bir çox ölkəsi üçün səyahət ayıdır. Bu, neftə tələbatın artması deməkdir. Ümid edirəm ki, atılan müsbət addımlar davam edəcək və qiymətlər aşağı düşəcək, bu da dünya iqtisadiyyatının rahat nəfəs almasına imkan verəcək”, - deyə Fatih Birol qeyd edib.
O bildirib ki, müharibə səbəbindən bir çox enerji obyektləri, boru kəmərləri, təbii qaz yataqları, neft emalı zavodları və enerji terminalları zədələnib, lakin bu zərərin böyük bir hissəsi qısa müddətdə bərpa edilə bilər, lakin bəziləri vaxt aparacaq. Bu gündən sabaha hər şeyin müharibədən əvvəlki vəziyyətə qayıdacağını düşünmək düzgün deyil. Lakin Səudiyyə Ərəbistanı, Birləşmiş Ərəb Əmirlikləri və Küveyt kimi bəzi ölkələr daha tez qayıda bilər. İraqın və digər ölkələrin geri qayıtması vaxt apara bilər.
Bərpaolunan enerji investisiyalarının artacağını bildirən Fatih Birol qeyd edib: “Bərpaolunan enerji bütün dünyada çox sürətlə artır. Bu, ölkələrin ekoloji cəhətdən təmiz olması üçün deyil, tamamilə iqtisadi səbəblərdən qaynaqlanır. 2025-ci ildə dünyada tikilən bütün elektrik stansiyalarının 75 faizi bərpaolunan enerji olacaq. Bu müharibə və böhran bir çox ölkəyə enerji təhlükəsizliyinin nə qədər vacib olduğunu bir daha xatırladır”.
Bölmənin digər xəbərləri
