Azərbaycan nüfuzlu beynəlxalq tədbirlərin keçirildiyi məkana çevrilib RƏY
Bakı, 18 iyun, AZƏRTAC
Azərbaycan nüfuzlu beynəlxalq tədbirlərin keçirildiyi məkana çevrilib. Ölkəmiz bu statusunu uzun müddətdir ki, təsdiqləyib. Bu ilin əvvəlindən etibarən mötəbər beynəlxalq tədbirlərin Bakıda keçirilməsi də buna sübutdur. Bu gün isə Bakı İslam İnkişaf Bankı Qrupunun 2026-cı il üzrə İllik Toplantısına ev sahibliyi edir.
Bu fikirləri AZƏRTAC-a açıqlamasında Milli Məclisin deputatı Sevinc Fətəliyeva deyib.
Deputat bildirib ki, İslam İnkişaf Bankı maliyyələşdirməni İslam prinsiplərinin əsasında aparılan beynəlxalq maliyyə-kredit qurumlarından biridir. Üzvləri müsəlman ölkələridir. Bankın məqsədi üzv ölkələrin və fərdi müsəlman cəmiyyətlərinin iqtisadi inkişafının və sosial tərəqqisini İslam hüququ əsasında təmin etməkdir. İyunun 18-də İslam İnkişaf Bankı Qrupunun 2026-cı il üzrə İllik Toplantılarının açılış mərasimində iştirak edən Prezident İlham Əliyev çıxışı zamanı bildirib ki, Azərbaycanın sabit, uğurlu inkişafı var. Bu, həyata keçirdiyimiz milli maraqlara əsaslanan siyasətin, qlobal səhnədə bütün iştirakçılarla olan münasibətlərin inkişafının və bizim uğurlu inkişafımızın nümayişidir. Prezidentin dediyi kimi, regional səviyyədə və qlobal səhnədə güclü əlaqələri ilə Azərbaycan bir çox aspektlər baxımından artıq mühüm iştirakçıya çevrilib. Dövlətimizin başçısı qeyd edib ki, müstəqil xarici siyasət sayəsində biz beynəlxalq ictimaiyyətin güclü dəstəyini qazandıq və dostlarımızın sayı ilbəil artır.
Milli Məclis deputatının sözlərinə görə, hazırda Azərbaycan bir sıra ölkələrin enerji təhlükəsizliyinin təmin olunmasında mühüm rol oynayır. Bu gün 16 ölkəyə Azərbaycan qazı ixrac edilir və onların 12-i Avropa ölkəsidir. Azərbaycan qlobal enerji səhnəsində mühüm iştirakçıya çevrilib, genişmiqyaslı enerji infrastruktur layihələrinin təşəbbüskarı və həyata keçirən ölkə kimi çıxış edib. Azərbaycan Avrasiya bölgəsində bir çox ölkələri əhatə edən layihələr həyata keçirib və enerjiyə ehtiyacı olan ölkələrə yardım göstərib. “Təbii qazın təchizatına gəldikdə, Azərbaycan bu gün boru kəməri qazının təchizatının coğrafiyası baxımından birinci yerdədir. Biz 16 ölkəyə təbii qaz təchiz edirik, bu say ilbəil artır və artmaqda da davam edəcək”, - deyən dövlətimizin başçısı Azərbaycanın iqtisadi vəziyyətinə də toxunub və iqtisadi inkişafımızla bağlı hər hansı çətinliklər gözləmədiyimizi bəyan edib.
Sevinc Fətəliyeva qeyd edib ki, İslam ölkələrinin çoxsaylı nümayəndələrinin iştirak etdiyi beynəlxalq tədbirdə Ermənistanın işğalçılıq siyasəti zamanı törətdiyi vəhşiliklərin bir daha xatırlanması zərurətdir. Çünki Azərbaycan müsəlman ölkəsi olduğu üçün işğalçılar qəsb etdiyi ərazilərdə İslam dəyərlərinə, abidələrinə qarşı vandalizm törədiblər. Prezidentin dediyi kimi, biz Ermənistanın işğalçı qüvvələrinin xalqımıza, şəhərlərimizə qarşı etdiklərini heç vaxt yaddan çıxarmayacağıq, 65 məscidin dağıdılmasını yaddan çıxarmayacağıq.
“Bütövlükdə, belə bir mötəbər tədbirin Bakıda keçirilməsi ölkəmizin artan beynəlxalq nüfuzunun daha bir nümunəsidir. Bu toplantı iqtisadiyönümlü olsa da, Azərbaycanın dünya miqyasında siyasi çəkisinin güclənməsində də əhəmiyyətli təsir göstərir”, - deyə deputat vurğulayıb.
Bölmənin digər xəbərləri
