Balaxanıda gənclərin iştirakı ilə biomüxtəlifliyə həsr olunmuş tədbir təşkil edilib
Bakı, 23 may, AZƏRTAC
Beynəlxalq Biomüxtəliflik Günü münasibətilə Balaxanı Ekoloji Mərkəzində və Botanika Bağında keçirilən tədbirdə uşaqlar və gənclər bir araya gələrək Azərbaycanın təbii sərvətlərinin qorunmasına olan bağlılıqlarını nümayiş etdiriblər. “Cool Kids Conserve!” (Təbiəti Qoruyan Uşaqlar) şüarı ilə baş tutan tədbir ilhamlandırıcı çıxışlar, interaktiv fəaliyyətlər və maarifləndirici sessiyalarla zəngin olub.
BMT-nin Ərzaq və Kənd Təsərrüfatı Təşkilatının (FAO) Azərbaycandakı Tərəfdaşlıq və Əlaqələr Ofisindən AZƏRTAC-a bildirilib ki, tədbirin açılışında çıxış edən FAO-nun Azərbaycandakı nümayəndəsinin müavini Bariz Mehdiyev biomüxtəlifliyin qorunmasında gənclərin roluna diqqət çəkib. “Bu tədbir bizi köklərimizə qaytarır və bu planetin gələcək sahiblərini, uşaqları bu işə cəlb edir”, - deyə o diqqətə çatdırıb.
FAO-nun baş texniki mütəxəssisi Peter Pechacek və layihə rəhbəri Aytən Şirinova layihənin uğurlarından danışaraq, daha güclü tərəfdaşlıqlar və geniş ictimai iştirakla irəliyə doğru planları açıqlayıblar. “EkoSfera” Sosial-Ekoloji Mərkəzinin direktoru Firuzə Sultan-zadə isə uşaqların təbiətə marağını və liderlik potensialını vurğulayıb.
FAO-nun Azərbaycandakı nümayəndəsi Nasar Hayat çıxışında Azərbaycanın biomüxtəlifliyi barədə danışaraq bildirib ki, ölkə Qafqaz regionunun bir hissəsi kimi unikal ekosistemlərə və zəngin bioloji irsə sahibdir. Dağlardan tutmuş Xəzər sahillərinə qədər uzanan müxtəlif landşaftlar Azərbaycanın mikroiqlim və yaşayış mühitlərinin genişliyini əks etdirir.
N.Hayat qeyd edib ki, bu təbii irs müxtəlif təzyiqlərlə üzləşir: torpağın qeyri-davamlı istifadəsi, qanunsuz ovçuluq, çirklənmə və iqlim dəyişikliyi ekosistemləri təhdid edir. Bu çağırışlara qarşı mühüm cavab tədbiri kimi ölkədə 10,3 faizlik ərazini əhatə edən geniş mühafizə olunan ərazilər şəbəkəsi formalaşdırılıb. Xüsusilə, Şirvan və Hirkan Milli parkları biomüxtəlifliyin həm zənginliyini, həm də qorunma zərurətini nümayiş etdirir. Şirvan Milli Parkındakı Qızılqaz gölü quşların miqrasiyası üçün vacib dayanacaqdır. Hirkan Milli Parkı isə UNESCO tərəfindən Ümumdünya İrs Siyahısına daxil edilmiş qədim meşələri və Xanbulan gölü kimi mühüm su mənbələrini əhatə edir.
Nasar Hayat FAO ilə Ekologiya və Təbii Sərvətlər Nazirliyinin (ETSN) birgə həyata keçirdiyi və Qlobal Ətraf Mühit Fondu tərəfindən maliyyələşdirilən layihənin əhəmiyyətini vurğulayaraq, mühafizə olunan ərazilərdə landşaft əsaslı, inteqrasiya olunmuş idarəetmə modellərinin qurulduğunu vurğulayıb.
Tədbirin praktiki hissəsində uşaqlar keramika ustad dərslərində iştirak ediblər, “ekodetektiv” oyunu oynayıblar və milli parklar haqqında sənədli film izləyiblər. Botanika Bağında isə biomüxtəliflik sərgiləri və simvolik ağacəkmə mərasimi keçirilib.
Builki tədbir FAO-nun 80 illik yubileyinə həsr olunan “365 Günlük Fəaliyyət” kampaniyasının tərkib hissəsi olmaqla yanaşı, Azərbaycanın ev sahibliyi etdiyi COP29-un davamı olaraq, gənclərin qlobal ekoloji səslərinin daha geniş auditoriyalara çatdırılmasına xidmət edir. Tədbir bir daha göstərir ki, təbiətin qorunması yalnız siyasətçilərin və ekspertlərin deyil, gənclərin də işi olmalıdır. Uşaqlar sadəcə iştirakçı deyil, gələcəyin liderləridir. Hər bir kiçik addım, - ağac əkmək, öyrənmək, paylaşmaq, - böyük dəyişikliklərin başlanğıcı ola bilər.
FAO və Qlobal Ekoloji Fond tərəfindən dəstəklənən “Biomüxtəlifliyin mühafizəsi və davamlı istifadəsi: İdarəetmənin təkmilləşdirilməsi yolu ilə Azərbaycanın xüsusi mühafizə olunan ərazilər sisteminin gücləndirilməsi” layihəsi Ekologiya və Təbii Sərvətlər Nazirliyi, “EkoSfera” Sosial-Ekoloji Mərkəzi və Bakı Abadlıq Xidmətinin tərəfdaşlığı ilə həyata keçirilir.
Bölmənin digər xəbərləri
