Banqladeş Çinin “Sinopharm” şirkətinin COVID-19 peyvəndini təcili istifadə üçün təsdiqləyib
Pekin, 29 aprel, AZƏRTAC
Banqladeşin Baş Dərman Administrasiyası Çinin “Sinopharm” şirkətinin COVID-19 virusu əleyhinə peyvəndini təcili istifadə üçün təsdiqləyib.
AZƏRTAC Çin KİV-lərinə istinadla xəbər verir ki, administrasiyanın rəhbəri Mahbuhur Rəhman paytaxt Dəkkədə keçirdiyi mətbuat konfransında 10 gün ərzində ölkəyə “Sinopharm” peyvəndinin ilk partiyasının gətiriləcəyini açıqlayıb.
Hökumət Çin və Rusiya peyvəndlərinin Banqladeşdə istehsalı təşəbbüsünü də bəyənib. Belə ki, hökumət yerli əczaçılıq şirkətlərinin çinli və rusiyalı tərəfdaşları ilə birgə “Sinopharm” və “Sputnik V” peyvəndlərinin ölkədə istehsalı ilə bağlı müraciətinə müsbət cavab verib.
Qeyd edək ki, hazırda pandemiyanın 2-ci və daha ağır dalğasının müşahidə olunduğu Banqladeşdə aprelin 5-dən sərt karantin rejimi tətbiq olunur. Mayın 5-dək davam edəcək bu rejimdə ictimai nəqliyyatın hərəkəti, dövlət qurumlarında və özəl sektorda iş fəaliyyəti dayandırılıb. Səhiyyə Xidmətləri üzrə Baş İdarəsinin məlumatına əsasən, ötən gün ölkədə virusa 2341 yoluxma aşkarlanıb, 88 ölüm halı baş verib. İndiyədək ölkədə 756 mindən çox yoluxma, 11 min 393 ölüm qeydə alınıb.
Şahin Cəfərov
AZƏRTAC-ın xüsusi müxbiri
Pekin
Bölmənin digər xəbərləri
