Baş katib: Limanlar sadəcə keçid qapısı deyil, strateji düyünlərdir VİDEO
Bakı, 9 sentyabr, AZƏRTAC
Qlobal iqtisadi və texnoloji inkişafda Asiyanın çəkisi artır. Asiyanın gücü onun müxtəlifliyində, bazarlarında və əlaqə qurmaq imkanlarındadır. Limanlarımız arasında əməkdaşlığı möhkəmləndirməklə biz regional əlaqələri hər kəs üçün daha təhlükəsiz, səmərəli, davamlı və faydalı edə bilərik.
AZƏRTAC xəbər verir ki, bu barədə Asiyada Qarşılıqlı Fəaliyyət və Etimad Tədbirləri üzrə Müşavirənin (AQEM) Baş katibi Kayrat Sarıbay “Limanların regional bağlantı və strateji əməkdaşlıqdakı rolu” mövzusunda keçirilən beynəlxalq konfransda çıxışı zamanı deyib.
O bildirib ki, bugünkü konfrans Asiyanın dörd bir yanından liman qurumlarını, nəqliyyat təşkilatlarını, biznes nümayəndələrini və beynəlxalq tərəfdaşları bir araya gətirir.
“Konfrans regional ticarətin və iqtisadi əməkdaşlığın gücləndirilməsi üçün həyati əhəmiyyət kəsb edən limanların inkişafı, dəniz nəqliyyatı və multimodal əlaqə ilə bağlı praktiki məsələlərin müzakirəsi üçün vaxtında yaradılmış bir imkandır. AQEM regionu üçün limanlar yük daşınması üçün sadəcə fiziki keçid qapıları deyil. Onlar dəniz marşrutlarını dəmir yolları, avtomobil yolları, hava limanları, logistika qovşaqları və sənaye zonaları ilə birləşdirən strateji düyünlərdir. Onların səmərəliliyi, təhlükəsizliyi və davamlılığı ticarət xərclərinə, bazarlara çıxışa və iqtisadiyyatlarımızın rəqabət qabiliyyətinə birbaşa təsir göstərir. Dənizə çıxışı olmayan üzv dövlətlər üçün dəniz infrastrukturu ilə etibarlı əlaqələr regional və qlobal ticarətdə daha tam iştirak üçün əvəzolunmazdır. AQEM-in Məşvərət Qurumu kimi Davamlı Əlaqəlilik üzrə xüsusi şuranın yaradılması ideyası ən yüksək siyasi səviyyədə irəli sürülüb. Bu təşəbbüsün mahiyyəti bu gün də son dərəcə aktualdır: davamlı nəqliyyat infrastrukturu, multimodal dəhlizlər, rəqəmsallaşdırılmış logistika, ekoloji cəhətdən davamlı mobillik, habelə daha rahat ticarət və tranzit axınları üzrə dialoqu və praktiki əməkdaşlığı təşviq etmək. Bu yolla nəqliyyat əlaqələri, ticarətin asanlaşdırılması və peşəkar təmaslar üzrə dialoq müxtəlif olan regionumuzda daha böyük qarşılıqlı anlaşmaya, proqnozlaşdırılmaya və ortaq maraqlara töhfə verə bilər”, - deyə Baş katib vurğulayıb.
K.Sarıbay qeyd edib ki, Azərbaycanın sədrliyi dövründə əlaqəliliyə xüsusi diqqət yetirilib: “Bugünkü konfrans, həmçinin peşəkar əlaqələrin möhkəmləndirilməsi, əməliyyat təcrübəsinin bölüşülməsi, Asiyada Qarşılıqlı Fəaliyyət və Etimad Tədbirləri üzrə Məşvərətə (AQEM/ CICA) üzv dövlətlərin liman qurumları arasında daha sıx əməkdaşlığın dəstəklənməsinin praktiki yollarını nəzərdən keçirmək üçün bizə imkan yaradır. AQEM Katibliyi öz səlahiyyətləri və mövcud resursları çərçivəsində maraqlı üzv dövlətlər arasında ünsiyyət və informasiya mübadiləsini asanlaşdırmağa, eləcə də bu konfrans tərəfindən qəbul edilmiş tövsiyələrin icrasını dəstəkləməyə hazırdır. Ümid edirik ki, bugünkü müzakirələr davamlı peşəkar əlaqələrə, texniki görüşlərə və maraqlı üzv dövlətlərin könüllü ev sahibliyi ilə həyata keçiriləcək gələcək təşəbbüslərə gətirib çıxaracaq”.
Bölmənin digər xəbərləri
