Baş katib: Şahmatçılarımızın uğurunun davamlı olacağına inanırıq
Bakı, 16 sentyabr, AZƏRTAC
Yeniyetmələrin Avropa çempionatında 7 medal qazanması böyük uğurdur. Medallardan dördünün qızıl olmasını isə xüsusi olaraq qeyd etmək istərdim.
AZƏRTAC xəbər verir ki, bu sözləri Azərbaycan Şahmat Federasiyasının baş katibi İlahə Qədimova Heydər Əliyev Beynəlxalq Aeroportunda jurnalistlərə açıqlamasında deyib.
O, yeniyetmələrin nəticəsini tarixi uğur adlandırıb: “Şahmatçılarımız əvvəllər heç vaxt qitə çempionatında 4 qızıl medal qazanmayıb. Bu, federasiyanın son illər gördüyü sistemli işin nəticəsidir”.
Baş katib parlaq qələbə münasibətilə şahmatçıları, onların məşqçilərini və valideynlərini təbrik edib: “Uğurun davamlı olacağına ümid edirik. Gələn ay şahmatçılarımız yeniyetmələr arasında dünya çempionatına yollanacaq. Rumıniyadan sonra dünya çempionatında da uğurlu çıxış edəcəklərinə inanırıq”.
Qeyd edək ki, Rumıniyanın Mamaya şəhərində keçirilən Avropa çempionatında Məhəmməd Kazımzadə, Mehriban Əhmədli (hər ikisi U-8), Əhməd Xaqan (U-12), Rüstəm Rüstəmov (U-14) qızıl, Ayan Allahverdiyeva və Xəzər Babazadə gümüş, Səadət Bəşirli isə bürünc medal qazanıb. Yekunda Azərbaycan komanda hesabında da hamını qabaqlayaraq birinci yeri tutub.
Bölmənin digər xəbərləri
