BƏƏ-nin taksi operatoru 20 min qadını işlə təmin edəcək
Əbu-Dabi, 9 mart, AZƏRTAC
Birləşmiş Ərəb Əmirliklərinin “Careem” taksi operatoru 8 Mart - Beynəlxalq Qadınlar Günü münasibətilə sürücü qadınlara artan tələbatı ödəmək üçün qarşıdan gələn iki il ərzində Yaxın Şərqin 13 ölkəsində təqribən 20 min qadın işə götürmək planlarını açıqlayıb. AZƏRTAC yerli KİV-lərə istinadla xəbər verir ki, hazırda “Careem” şirkətinin BƏƏ, Misir, Pakistan, Mərakeş, Livan və Fələstində artıq sükan arxasında oturmuş 500 qadın əməkdaşı var.
Şirkətin həmtəsisçisi və icraçı direktoru Müdəsir Şeyxə bildirib ki, bu addım təkcə mənəvi öhdəçilik deyildir, həm də qadınların köməyi ilə biznesi inkişaf etdirmək və onların pul qazanmalarına şərait yaratmaq üçün böyük imkandır. Onun sözlərinə görə, çox vaxt ailənin başçısı qadınlar olur və dolanışıq üçün alternativ və çevik üsullar axtarırlar.
Qeyd edilib ki, Səudiyyə Ərəbistanı ötən ilin sentyabrında qadınların maşın sürməsinə icazə verəndən sonra “Careem” şirkəti Ər-Riyad, Ciddə və Dammamda 2 mindən çox qadın işə götürüb. Regionun bəzi bölgələrində sabitlik olmadığına görə sürücü qadınların təhlükəsizliyinin təmin edilməsi üçün daha etibarlı tədbirlər görüləcək.
Asya Hacızadə
AZƏRTAC-ın xüsusi müxbiri
Əbu-Dabi
Bölmənin digər xəbərləri
