BELÇİKA DİPLOMATI MOSKVADA MİLİS ƏMƏKDAŞLARINI DÖYMÜŞDÜR

26.05.2006 [14:35]
Çap et
A⁺ A^-

AZƏRTAC “İnterfaks” agentliyinə istinadla xəbər verir ki, Belçikanın Rusiyadakı səfirliyinin ticarət attaşesi mayın 25-də gecə Moskva milisinin iki əməkdaşını döymüşdür. Nəticədə asayiş keşikçilərindən birinin burnu sındırılmış və xəstəxanaya aparılmışdır. İkincisinin aldığı yumruq zərbələri nisbətən yüngül olmuşdur.

Moskva hüquq mühafizə orqanlarının məlumatına görə, belçikalı gecə yarısı restorandan çıxaraq, səfirliyin avtomobilinin sükanı arxasında əyləşmiş və maşını əks istiqamətdə sürməyə başlamışdır. Yol-Patrul Xidmətinin əməkdaşları maşını saxlamış və diplomatdan sənədlərini göstərməyi xahiş etmişlər. Bunun əvəzində o, yumuruqlarını işə salmışdır. Milis əməkdaşları diplomatı yalnız küçədən keçənlərin köməyi ilə ram edə bilmişlər.

Belçika diplomatik nümayəndəliyinin mətbuat xidməti isə bildirmişdir ki, onun əməkdaşı döyülmüş, eynəyi sındırılmış və 5 min rublu götürülmüşdür.