BELÇİKADA DƏHŞƏTLİ QAZ PARTLAYIŞI OLMUŞDUR

30.07.2004 [22:23]
Çap et
A⁺ A^-

AZƏRTAC-ın xüsusi müxbiri xəbər verir ki, Belçikanın cənubundakı sənaye sahəsinin yaxınlığında yeraltı qaz anbarının partlaması nəticəsində ən azı 15 nəfər həlak olmuş, yüzlərlə adam isə xəsarət almışdır. Onlardan 24 nəfərinin vəziyyəti olduqca ağırdır.

Partlayış nəticəsində baş vermiş alovun hündürlüyü onlarla metr yuksəkliyə qalxmışdır. Yanğını söndürmək üçün bu ölkəyə yaxın sərhəddəki Fransa şəhərlərinin yanğınsöndürənləri belçikalı həmkarlarına köməyə gəlmişlər. Partlayış o dərəcədə güclü olmuşdur ki, insan bədəninin hissələrini hadisə yerindən yüz metrlərlə kənara tullamışdır. Qəzanın baş verdiyi yerdə dairəsi 500 metr olan dərin çuxur yaranmışdır.

İtaliyada dincələn ölkənin baş naziri istirahətini yarımçıq qoyaraq təcili hadisə yerinə gəlmişdir.

Hadisənin başvermə səbəbini araşdırmağa başlayan mütəxəssislərin ilkin məlumatına görə, yeraltı anbardan qaz sızması partlayışa səbəb olmuşdur.