Bələdiyyələrin yerli əhəmiyyətli məsələlərin həllində iştirakının genişləndirilməsi üçün yerli büdcələri artırılmalıdır
Bakı, 12 aprel, AZƏRTAC
Bələdiyyələrin Ulu Öndər Heydər Əliyevin çox dəqiqliklə müəyyənləşdirdiyi hədəflərə doğru irəliləməsi, onların yerli əhəmiyyətli məsələlərin həllində iştirakının genişləndirilməsi üçün mühüm şərtlərdən biri yerli büdcələrin imkanlarının artırılmasıdır. Bu məqsədlə Ədliyyə Nazirliyi tərəfindən qanunvericiliklə müəyyənləşdirilmiş gəlir mənbələrindən tam və səmərəli istifadə olunması, o cümlədən yerli vergilər üzrə vergitutma obyektlərinin uçotunun dəqiqləşdirilməsi, vergilərin qanunauyğun hesablanaraq yığılmasının təmin olunması üçün tədbirlər görülür və müsbət nəticələr əldə edilir.
AZƏRTAC xəbər verir ki, bu barədə “Heydər Əliyev yerli özünüidarəetmənin banisidir” mövzusunda konfransda nazirliyin Bələdiyyələrlə iş mərkəzinin rəis müavini Elmin Həsənov çıxış edərkən deyib.
O qeyd edib ki, son iki ildə ümumi yerli büdcə gəlirləri 2020-ci illə müqayisədə üçdə bir dəfə (12,4 milyon manat 3 faiz), o cümlədən yerli vergilərdən daxil olmalar isə 43 faiz (6 milyon manat) artıb. Həmçinin ötən ilin yerli büdcə gəlirləri 2014-cü ildən sonra ən yüksək məbləğdə olub. Büdcə gəlirləri ötən illə təxminən eyni səviyyədə olub 2013-cü və 2014-cü illərdə ümumi büdcə gəlirlərinin 50 faizə yaxın hissəsini torpaq satışından əldə olunan vəsait təşkil edirdisə, 2022-ci ildə isə büdcənin əsaslı artımında vergi gəlirləri üstünlük təşkil edib, torpaq satışından daxil olmalar 2,5 dəfə azalıb.
Bələdiyyə idarəçiliyinin səmərəliliyinin artırılmasının digər mühüm şərti yerli əhalinin ona ictimai etimadının və inamının olmasından, nəticə etibarilə bələdiyyəsini dəstəkləməkdən ibarətdir. Yerli özünüidarəetmənin mahiyyəti yerli əhali ilə sıx təmasda olmaq, onların problemlərinə, müraciətlərinə həssaslıqla yanaşmaqdır.
Ədliyyə Nazirliyi tərəfindən yerli əhəmiyyətli məsələlərin həllində iştirak edən bələdiyyələrin rolunun ictimaiyyətə çatdırılması məqsədilə zəruri tədbirlər görülməsinə diqqət artırılıb. Əhalinin bələdiyyələrlə sıx əlaqələrinin qurulması, özünüidarə işlərində onların getdikcə daha fəal iştirak etmələri, bələdiyyə idarəçiliyinə əhalinin maraq və inamının artması Ümummilli Lider tərəfindən seçilmiş yolun düzgünlüyünü və dönməzliyini göstərir. Eyni zamanda Ədliyyə Nazirliyi yanında İctimai Şuranın üzvlərinə yerli özünüidarəetmədə ictimai iştirakçılığa xüsusi önəm verərək Şuranın tərkibində yerli özünüidarəetmə üzrə Komitə yaradılıb.
“Azərbaycan xalqı bütün həyatını qüdrətli Azərbaycan dövlətinin yaradılmasına və inkişafına həsr etmiş Ümummilli Liderin əziz xatirəsini daim uca tutur və ehtiramla yad edir. İnanıram ki, Ulu Öndərin adı ilə bağlı olan bu əlamətdar ildə ölkəmizdə yerli demokratiyanın inkişafı, bələdiyyələrin fəaliyyətində səmərəliliyin artırılması sahəsində də diqqətəlayiq uğurlar qazanacaq”, - deyə rəis müavini Elmin Həsənov vurğulayıb.
Bölmənin digər xəbərləri
