Beş faydalı qazıntı yatağı hərraca çıxarılacaq
Bakı, 15 may, AZƏRTAC
İqtisadiyyat Nazirliyi yanında Əmlak Məsələləri Dövlət Xidmətinin Hərracların Təşkili Mərkəzi və Ekologiya və Təbii Sərvətlər Nazirliyi yanında Dövlət Mineral Xammal Ehtiyatlarından İstifadə Agentliyi tərəfindən faydalı qazıntı yataqlarının istifadəyə verilməsi üzrə növbəti hərrac iyunun 14-də keçiriləcək.
Dövlət Xidmətindən AZƏRTAC-a bildirilib ki, hərracda Ağcabədi rayonunda yerləşən “Qarqarçay III” (15,3 ha), Qəbələdə “Siləyli” (8 ha), İsmayıllıda “Bilistan” (7 ha) və “Maçaxi” (3 ha) qum-çınqıl yataqları, Salyanda “Babazənən-I” gil yatağı (6 ha) investorlara təklif olunacaq.
İddiaçılar hərraclarda iştirakla bağlı sənədləri iyunun 7-si saat 16:00-dək Dövlət Mineral Xammal Ehtiyatlarından İstifadə Agentliyinə (Bakı şəhəri, Səbail rayonu, İstiqlaliyyət küçəsi, 31) təqdim edə bilərlər. Əsas şərtlər tоplusunu almaq və hərracda iştirak etmək üçün iddiaçılar hərrac haqqında elanda qeyd оlunan məbləğdə xidmət haqqını və behi ödəməlidirlər. Əmlak Xidmətləri Məkanında keçiriləcək hərracda xarici ölkələrin hüquqi və fiziki şəxsləri də iştirak edə bilər.
Hərrac elanı ilə Əmlak Məsələləri Dövlət Xidmətinin rəsmi saytında (https://clck.ru/34PucS) və “Özəlləşdirmə portalı”nda (https://clck.ru/34PudZ) tanış olmaq olar.
Bölmənin digər xəbərləri
