Naxçıvan, 17 noyabr, AZƏRTAC 

Noyabrın 17-də beşinci çağırış Naxçıvan Muxtar Respublikası Ali Məclisinin birinci sessiyası keçirilib.

Naxçıvan Muxtar Respublikası Ali Məclisinin mətbuat xidmətindən AZƏRTAC-a bildirilib ki, Naxçıvan Muxtar Respublikası Ali Məclisinin deputatları müstəqil Azərbaycan dövlətinin memarı və qurucusu, ümummilli liderimiz Heydər Əliyevin Naxçıvan şəhərinin mərkəzində əzəmətlə ucalan abidəsini ziyarət edib, abidə önünə tər gül dəstəsi düzüblər.

Naxçıvan Muxtar Respublikası Ali Məclisinin deputatları ümummilli liderin abidəsi önündə xatirə şəkli çəkdiriblər.

Sonra sessiya öz işinə başlayıb.

Naxçıvan Muxtar Respublikası Ali Məhkəməsinin sədri Ramiz Süleymanov Naxçıvan Muxtar Respublikası Ali Məclisinə 1 noyabr 2015-ci il tarixdə keçirilmiş seçkilərin nəticələrinin yoxlanılması və təsdiq edilməsinə dair çıxış edərək deyib ki, seçici siyahılarına daxil edilmiş 268 min 463 nəfərdən 205 min 166 nəfəri, yəni 76,4 faizi seçkidə iştirak edib. Seçki qutularında aşkar edilən bülletenlərdən 203 min 991-i, yəni 99,4 faizi etibarlı hesab edilibdir. Seçkilərin keçirilməsi və səsvermənin nəticələrinin müəyyənləşdirilməsi zamanı qanun pozuntularına yol verilməyib, aşkarlıq təmin edilib, müxtəlif xarici və yerli, o cümlədən siyası partiyaların müşahidəçiləri seçkilərin gedişini və səslərin hesablanmasını izləyiblər. Təqdim edilmiş sənədlərin təhlili nəticəsində Naxçıvan Muxtar Respublikası Ali Məclisinə keçirilmiş seçkilərin qanunvericiliyə uyğun olduğu, demokratik, aşkarlıq və hər kəsin öz iradəsini sərbəst ifadə etdiyi şəraitdə keçirildiyi müəyyən edilib. Ona görə də Naxçıvan Muxtar Respublikası Ali Məhkəməsinin Rəyasət Heyəti konstitusiya icraatı qaydasında işə baxaraq, Naxçıvan Muxtar Respublikası Konstitusiyasının 16-cı maddəsinə, “Naxçıvan Muxtar Respublikası Ali Məclisinə seçkilər haqqında” Naxçıvan Muxtar Respublikası Qanununun 93.1-ci və 93.4-cü maddələrinə uyğun olaraq keçirilən seçkilərin nəticələrini 2015-ci il 10 noyabr tarixli qərarı ilə bütövlükdə təsdiq edib. Bununla da Naxçıvan Muxtar Respublikası Ali Məclisinə 2015-ci il 1 noyabrda keçirilən seçkilərdə 45 seçki dairəsi üzrə seçilmiş 45 deputatın səlahiyyətləri təsdiq edilib.

Naxçıvan Muxtar Respublikası Ali Məclisinin Daxili Nizamnaməsinin 2-ci maddəsinə əsasən Naxçıvan Muxtar Respublikası Mərkəzi Seçki Komissiyasının sədri Məhərrəm Qasımov beşinci çağırış Naxçıvan Muxtar Respublikası Ali Məclisinə seçilmiş deputatların siyahısını oxuyub.

Beşinci çağırış Naxçıvan Muxtar Respublikası Ali Məclisinin birinci sessiyasının ilk iclasına 12 saylı Yuxarı Daşarx Seçki Dairəsindən deputat Tariyel Talıbov sədrlik edib.

1 noyabr 2015-ci il tarixdə Naxçıvan Muxtar Respublikası Ali Məclisinə keçirilən seçkilər zamanı Naxçıvan Muxtar Respublikası Ali Məclisinə seçilmiş 45 deputatın hamısı sessiyada iştirak etdiyindən sessiya öz işinə başlamağa səlahiyyətli hesab edilib.

Azərbaycan Respublikasının Dövlət himni səslənib.

Sessiyada Naxçıvan Muxtar Respublikası Ali Məclisi Sədrinin seçilməsi məsələsi müzakirə edilib.

14 saylı Danyeri Seçki Dairəsindən deputat Asim Əliyev çıxış edərək Naxçıvan Muxtar Respublikası Ali Məclisinə Sədr seçilmək üçün Vasif Yusif oğlu Talıbovun namizədliyini irəli sürərək deyib: 2015-ci il noyabrın 1-də Azərbaycan Respublikasının Milli Məclisinə və Naxçıvan Muxtar Respublikasının Ali Məclisinə keçirilən seçkilər bir daha göstərdi ki, muxtar respublika əhalisi ümummilli lider Heydər Əliyev yolunun davam etdirilməsinə alternativ görmür. Bu da səbəbsiz deyil. Çünki son illər bu yolun uğurla davam etdirilməsi nəticəsində muxtar respublikada bütün sahələrdə inkişaf və tərəqqiyə nail olunub. 1995, 2000, 2005 və 2010-cu illərdə Naxçıvan Muxtar Respublikası Ali Məclisinə Sədr seçilmiş Vasif Talıbovun rəhbərliyi ilə Naxçıvan Muxtar Respublikasında sənaye, kənd təsərrüfatı, təhsil, səhiyyə, mədəniyyət inkişaf etdirilib, ordu quruculuğu sahələrində tədbirlər görülüb, yeni iş yerləri açılıb. Ötən dövrdə milli dəyərlərimizin qorunub yaşadılması, tarixi abidələrin bərpası istiqamətində də ardıcıl tədbirlər həyata keçirilib, Naxçıvanın tarixi, ələlxüsus 5 min illik şəhər mədəniyyəti sistemli şəkildə öyrənilib.

Deputat Asim Əliyev qeyd edib ki, muxtar respublikada iqtisadi inkişafın vacib göstəricisi hesab olunan ərzaq və enerji təhlükəsizliyi tam təmin edilib. Hazırda Naxçıvanda 336 növdə məhsula olan tələbat yerli istehsal hesabına ödənilir. Bir vaxtlar gecələri zülmət qaranlığa qərq olan Naxçıvanın bu gün gecəsi də gündüzü kimidir. Muxtar respublika enerji idxalçısından onu ixrac edən regiona çevrilib. İndi Naxçıvanda texniki inqilabın ən son nailiyyətləri tətbiq olunur. Naxçıvan sabitlik və inkişaf diyarıdır. Hansı sahəyə diqqət yetirsək, böyük dəyişikliklərin, inkişafın şahidi olarıq. Qəbul olunan dövlət proqramları uğurla icra olunur, əhalinin rahat və firavan yaşayışı təmin edilir. Təqdirolunası haldır ki, bu tədbirlər Naxçıvan şəhərində də, ən ucqar dağ kəndində də eyni səviyyədə aparılır. Bir sözlə, iqtisadi inkişafı faizlərlə deyil, dəfələrlə ölçülən, günbəgün müasirləşən qədim Naxçıvanda hər gün bir yeniliyə imza atılır. Artıq blokada çətinlikləri unudulub, həyat norması olan yeniləşmə isə daha xoşbəxt gələcəyin carçısına çevrilib.

Asim Əliyev deyib: Sadalanan bu uğurlar hörmətli Vasif Talıbovun muxtar respublikaya uğurlu rəhbərliyi sayəsində mümkün olub. Muxtar respublikanın keçdiyi inkişaf yolu, - “Mən istəyirəm ki, mənim arzum, istəklərim, Azərbaycan dövləti haqqında, müstəqil Azərbaycanın gələcəyi haqqında və Azərbaycanın ayrılmaz hissəsi olan Naxçıvan haqqında planlarım, arzularım yerinə yetirilsin”, - deyən ulu öndər Heydər Əliyevin ideyalarına dərin sədaqətin təcəssümüdür. Seçicilərimin mənə verdiyi vəkaləti nəzərə alıb, 7 saylı Aralıq seçki dairəsindən Naxçıvan Muxtar Respublikası Ali Məclisinə deputat seçilmiş Vasif Yusif oğlu Talıbovun yenidən Naxçıvan Muxtar Respublikası Ali Məclisinin Sədri vəzifəsinə namizədliyini irəli sürürəm! Hesab edirəm ki, bu, həm seçicilərimizin, həm də deputat həmkarlarımın fikridir!

Naxçıvan Muxtar Respublikası Ali Məclisinin deputatlarından Sevda Quluyeva, Namiq Məmmədov və Saleh Məhərrəmov çıxış edərək deputat Vasif Talıbovun yenidən Ali Məclisin Sədri seçilməsi təklifini dəstəkləyiblər.

Deputatlar Naxçıvan Muxtar Respublikası Ali Məclisinin Sədri vəzifəsinə irəli sürülmüş namizədin açıq səsvermə yolu ilə seçilməsini təklif ediblər. Səsvermənin nəticələrini hesablamaq üçün 3 nəfərdən ibarət hesablayıcı komissiya seçilib.

Sonra səsvermə keçirilib.

Hesablayıcı komissiyanın yekun protokoluna əsasən səsvermədə iştirak edən 45 deputatın hamısı 7 saylı Aralıq seçki dairəsindən seçilmiş deputat Vasif Yusif oğlu Talıbovun lehinə səs verib. Beləliklə, Vasif Yusif oğlu Talıbov yenidən Naxçıvan Muxtar Respublikası Ali Məclisinin Sədri seçilib.

Naxçıvan Muxtar Respublikası Ali Məclisinin Sədri Vasif Talıbov sessiyada çıxış edib.

 Beşinci çağırış Naxçıvan Muxtar Respublikası Ali Məclisinin

birinci sessiyasında muxtar respublika Ali Məclisinin 

Sədri Vasif Talıbovun

Ç I X I Ş I

Hörmətli deputatlar!

Hörmətli sessiya iştirakçıları!

Bu gün biz beşinci çağırış Naxçıvan Muxtar Respublikası Ali Məclisinin ilk sessiyasına toplaşmışıq.

Ali Məclisin ötən çağırışdakı fəaliyyət dövründə muxtar respublikada inkişaf təmin edilmiş, yeniləşməyə nail olunmuşdur. Əsası ümummilli liderimiz Heydər Əliyev tərəfindən qoyulan, ölkə Prezidenti cənab İlham Əliyevin rəhbərliyi ilə inkişaf etdirilən quruculuq xətti davam etdirilmiş, idarəetmə orqanlarının məsuliyyəti artırılmışdır.

Bu gün əminliklə demək olar ki, ötən beş ildə nəzərdə tutulan proqramlar icra olunmuş, yeni infrastruktur, istehsal və emal sahələri, sosial-mədəni obyektlər yaradılmış, əhalinin həyat səviyyəsinin daha da yüksəldilməsi üçün tədbirlər görülmüşdür.

Azərbaycanda və onun Naxçıvan Muxtar Respublikasında əldə olunmuş bütün nailiyyətlərin əsasında ümummilli liderimiz Heydər Əliyevin inkişaf konsepsiyası dayanır. Müstəqil ölkəmizin hər bir guşəsində olduğu kimi, Naxçıvan Muxtar Respublikasında da bu konsepsiyanın bəhrələri göz qabağındadır. Ötən illərin təcrübəsi bir daha göstərdi ki, heç bir qüvvə, kənar təsir Azərbaycanı Heydər Əliyev yolundan döndərə bilməz. Ümummilli liderimizin adı və əməlləri müstəqil Azərbaycanda bu gün olduğu kimi, gələcəkdə də yaşayacaqdır.

Noyabr ayının 1-də Azərbaycan Respublikasının Milli Məclisinə və Naxçıvan Muxtar Respublikasının Ali Məclisinə keçirilən seçkilər xalqımızın Heydər Əliyev yoluna sədaqətinin daha bir ifadəsi oldu. Bu gün seçkilərdə fəallıq göstərən, ulu öndərimizin siyasi kursunu dəstəkləyən bütün seçicilərə minnətdarlığımı bildirirəm!

Muxtar respublika Mərkəzi Seçki Komissiyasına, dairə və məntəqə seçki komissiyalarına, seçkilərin qanunvericiliyin tələbləri səviyyəsində keçirilməsini təmin edən bütün aidiyyəti orqanlara təşəkkür edirəm!

Eyni zamanda beşinci çağırış Naxçıvan Muxtar Respublikası Ali Məclisinin deputatlarını da muxtar respublika seçicilərinin yüksək etimadına layiq görüldüklərinə görə təbrik edirəm!

Hörmətli sessiya iştirakçıları!

Qarşıdakı dövrdə də biz fəaliyyətimizi gücləndirməli, əhalinin yaşayış səviyyəsini daha da yaxşılaşdırmalı, yeni istehsal sahələrinin və bununla bərabər yeni iş yerlərinin yaradılmasını təmin etməli, sosial sahələrin inkişafına diqqəti artırmalıyıq.

Qarşıda dayanan vəzifələrin icrasında hamınıza uğurlar arzulayır, çıxışımı ölkə Prezidenti cənab İlham Əliyevin fikirləri ilə tamamlayıram: “Biz irəliyə baxmalı, ölkəmizin uzunmüddətli, dayanıqlı və səmərəli inkişafını təmin etmək üçün çalışmalıyıq”.

Sağ olun!

Sonra sessiya öz işini Naxçıvan Muxtar Respublikası Ali Məclisinin Sədri Vasif Talıbovun sədrliyi ilə davam etdirib.

Sessiyanın gündəliyinə aşağıdakı məsələlər verilib:

1. Naxçıvan Muxtar Respublikası Ali Məclisi Sədrinin müavinlərinin seçilməsi

2. Naxçıvan Muxtar Respublikası Ali Məclisinin komitə sədrlərinin, sədr müavinlərinin və üzvlərinin seçilməsi

Sessiyanın iş qaydası, reqlamenti təsdiq olunub, Naxçıvan Muxtar Respublikası Ali Məclisi Sədrinin müavinlərinin seçilməsi məsələsi müzakirə edilib.

10 saylı Şərur şəhər Seçki Dairəsindən deputat Azər Yadulla oğlu Zeynalov Ali Məclis Sədrinin birinci müavini, 21 saylı Məzrə Seçki Dairəsindən deputat Mirhəşim Əhməd oğlu Seyidov isə Ali Məclis Sədrinin müavini seçiliblər.

Naxçıvan Muxtar Respublikası Ali Məclisi Sədrinin birinci müavini Azər Zeynalov minnətdarlıq edərək göstərilən etimadı doğruldacağını bildirib.

Sonra sessiyada Naxçıvan Muxtar Respublikası Ali Məclisi komitələrinin sədrləri, sədr müavinləri və üzvləri seçilib.

Bununla da beşinci çağırış Naxçıvan Muxtar Respublikası Ali Məclisinin birinci sessiyası öz işini başa çatdırıb.