BƏSTƏKAR ZÜLFÜQAR HACIBƏYOVUN YUBİLEYİ QEYD OLUNMUŞDUR

15.04.2004 [20:08]
Çap et
A⁺ A^-

Dövlət Musiqi Mədəniyyəti Muzeyinin təşkilatçılığı ilə Niyazinin ev muzeyində Azərbaycan musiqi mədəniyyətinin və Hacıbəyovlar nəslinin tanınmış nümayəndələrindən biri, əməkdar incəsənət xadimi, bəstəkar Zülfüqar Hacıbəyovun anadan olmasının 120-ci ildönümü qeyd edilmişdir.

AZƏRTAC-ın müxbiri xəbər verir ki, ev muzeyinin müdiri Rza Bayramov tədbiri açaraq, Zülfüqar Hacıbəyovun həyat və yaradıcılığının bəzi məqamlarından danışmışdır. 1915-ci ildə yazdığı “Aşıq Qərib” operasında musiqi folklorumuzla Avropa musiqisini əlaqələndirməyə çalışmış bəstəkar öz librettoları əsasında yazdığı “Əlli yaşında cavan”, “Varlı”, “Evliykən subay” musiqili komediyalarında məişətimizdəki eybəcərlikləri, qadın hüquqsuzluğunu ifşa etmiş, dövrünün haqsızlıqlarını açıb göstərmişdir.

Musiqişünaslardan Bakı Musiqi Akademiyasının dosenti Fərəh Əliyeva, AMEA-nın Memarlıq və İncəsənət İnstitutunun əməkdaşı Jülyetta Cəbrayılbəyli və başqaları qeyd etmişlər ki, bəstəkarın komediyaları musiqinin sadəliyinə, aydınlığına, habelə dramaturgiyasına görə başqalarından fərqlənir. Bəstəkarın sovet dövrü yaradıcılığı da zəngin olmuşdur.

Yubiley tədbirində Z.Hacıbəyovun “Aşıq Qərib” operasından parçalar, “Ləzginka” və sair əsərləri səsləndirilmişdir.