MƏDƏNİYYƏT
BETHOVENİN ƏLYAZMASI 1,5 MİLYON FUNT STERLİNQDƏN ARTIQ QİYMƏTƏ SATILMIŞDIR
Xarici informasiya agentliklərindən AZƏRTAC-a daxil olmuş məlumatda deyilir ki, Londonda “Sotbis” hərracında Lüdviq van Bethovenin simli kvartet üçün 127-ci skertso əsərinin not yazısı 1,5 milyon funt sterlinqdən artıq qiymətə satılmışdır. Hərracın nümayəndəsi bildirmişdir ki, alıcı adının çəkilməsini istəməmişdir.
31 səhifəlik əlyazma 1824-1825 –ci illərə, dahi alman bəstəkarı Bethoven knyaz Qolitsının xahişi ilə bu əsər üzərində işlədiyi vaxtlara aiddir. Əlyazmanın bir neçə səhifəsində dəyişiklik və qeydlər edilmişdir. Böyük bəstəkarın ölümündən sonra əlyazma bir neçə nəfərin, o cümlədən fransız müğənnisi və bəstəkarı Polina Viardonun əlinə düşmüşdür. Son vaxtlaradək isə o, Stokholmda Musiqi Mədəniyyətinə Yardım Fondunda saxlanılırdı.