Bəxtiyar Hacıyev: Satışa çıxarılan aylıq 8400 biletin 70 faizdən çoxu artıq satılıb
Tbilisi, 26 may, AZƏRTAC
Bu gündən Bakı və Tbilisi istiqamətində gündəlik sərnişin qatarları hərəkətə başlayıb. Bakıdan Tbilisiyə qatarla səfər müddəti təxminən 9 saat 30 dəqiqə təşkil edir, bunun təqribən 2 saatı sərhəd-gömrük prosedurlarına sərf olunur - hər iki ölkənin sərhədində 1 saatlıq yoxlama həyata keçirilir.
Bunu AZƏRTAC-a açıqlamasında “Azərbaycan Dəmir Yolları” QSC-nin (ADY) İctimaiyyətlə əlaqələr şöbəsinin müdiri Bəxtiyar Hacıyev deyib.
O qeyd edib ki, qatar Bakıdan saat 23:10-da yola düşür və 08:45-də Tbilisiyə çatır. Tbilisidən isə saat 21:00-da yola düşür və növbəti gün 06:45-də Bakıya çatır.
B.Hacıyevin sözlərinə görə, marşrut üzrə sərnişin tələbatı yüksəkdir və artan maraq səbəbindən bəzi reyslərə əlavə vaqonlar qoşulub.
Şöbə müdiri satışa çıxarılan aylıq 8400 biletin 70 faizdən çoxunun artıq satıldığını bildirib: “Qatarlara yenidən əlavə vaqonların qoşulacağı istisna edilmir”.
“Qatarlar Azərbaycan ərazisində Biləcəri, Yevlax, Gəncə və Ağstafa beynəlxalq stansiyalarında, Gürcüstan ərazisində isə Qardabani və Tbilisi Dəmir Yolu Vağzalında dayanır”, – deyə B.Hacıyev əlavə edib.
Qeyd edək ki, Bakı–Tbilisi–Bakı sərnişin qatarının hərəkəti 6 illik fasilədən sonra - mayın 26-da bərpa olunub və reyslərin gündəlik icrası planlaşdırılır.
Bölmənin digər xəbərləri
