Beyləqanda tullantıların idarə olunmasına cavabdeh şəxs cəzalandırılıb
Bakı, 27 aprel, AZƏRTAC
Ekologiya və Təbii Sərvətlər Nazirliyinə Beyləqan rayonunun Birinci Şahsevən kəndində məişət tullantılarının qalaqlanması ilə bağlı daxil olan şikayət yerində araşdırılıb.
Nazirliyin mətbuat xidmətindən AZƏRTAC-a bildiriblər ki, araşdırma zamanı ərazidə fəaliyyət göstərən “MKT İK” Məhdud Məsuliyyətli Cəmiyyətin Beyləqan filialının pambıq emalı zamanı formalaşan istehsalat və məişət tullantılarını su kanalına atdığı məlum olub. Faktla bağlı filialın direktoru Rəşid Məmmədov barəsində protokol tərtib olunub və o, vəzifəli şəxs qismində 2500 manat məbləğində cərimələnib.
Ərazinin qısa vaxt ərzində tullantılardan təmizlənməsi, müəssisədə formalaşan tullantıların qanunvericiliyə uyğun idarə olunması və gələcəkdə belə hallara yol verilməməsi məqsədilə filialın direktoruna icrası məcburi olan müddətli göstəriş verilib.
Bölmənin digər xəbərləri
