Beynəlxalq hüquqa hörmətsizlik edən Fransa ikili standartlardan hələ də əl çəkməyib
Bakı, 20 noyabr, AZƏRTAC
Ermənistan-Azərbaycan münaqişəsinin 30 ildən artıq davam etməsinin əsas səbəblərindən biri işğalçı ölkənin “böyük Ermənistan” dövləti yaratmaq planı idisə, digər səbəb beynəlxalq qurumların siyasi riyakarlığı, ikili standartları, işğalçını öz adı ilə çağırmaması və onlara dəstək verməsi olub. Həmin qrupun həmsədrlərindən biri də beynəlxalq hüquq normalarına Ermənistan qədər hörmətsizlik edən Fransa dövlətidir. Qarabağda bütün hərbi əməliyyatların dayandırıldığı və işğalçı Ermənistanın təslim olaraq öz qoşunlarını Azərbaycan ərazilərindən çıxarmağa başladığı bir vaxtda Minsk qrupunun həmsədrlərindən biri olan Fransada qondarma “Dağlıq Qarabağ respublikası”nı tanımağa hazırlıq görülməsi onun ikili standartlardan hələ də əl çəkməməsindən xəbər verir.
Bu fikirləri AZƏRTAC-a YAP Səbail rayon təşkilatı sədrinin müavini, politoloq Mehman İsmayılov deyib.
M.İsmayılov bildirib ki, indiyədək dünyanın heç bir ölkəsi, beynəlxalq təşkilatlar, hətta Ermənistanın özü belə “Dağlı Qarabağ respublikası”nın müstəqilliyini və bu bölgədə keçirilən “seçkilər”in heç birinin nəticəsini tanımayıb. Təəssüf ki, münaqişənin tənzimlənməsində vasitəçilik missiyasını üzərinə götürən Fransada bu istiqamətdə beynəlxalq hüququn normalarına zidd addım atılmasına hazırlıq işləri görülür. Yayılan məlumatlara görə, Paris meriyası qondarma “Dağlıq Qarabağ respublikası”nı tanımağa hazırlaşır. Fransa hətta üçtərəfli birgə bəyanatdan da nəticə çıxarmaq istəmir. Sanki unudur ki, həmin bəyanatı imzalayanlardan biri ATƏT-in Minsk qrupunun həmsədri olan Rusiya Federasiyası, digəri isə işğalçı Ermənistanın özüdür. Fransa bu addımı ilə beynəlxalq ictimaiyyəti bir daha inandırdı ki, Minsk qrupu formal bir qurumdur.
Prezident İlham Əliyev dünyanın aparıcı kütləvi informasiya vasitələrinə verdiyi müsahibələrdə münaqişənin nizamlanmasında ikili standartlar nümayiş etdirən beynəlxalq təşkilatları kəskin tənqid edərkən Minsk qrupunun fəaliyyətsizliyini də dəfələrlə diqqətə çatdırıb, hətta bu qurumun formal xarakter daşıdığını bildirib. Dövlətimizin başçısı Türkiyənin “Haber Global” telekanalına müsahibəsində bildirib ki, danışıqlar bu günə qədər Minsk qrupu çərçivəsində aparılır, ancaq bu danışıqların səmərəsi, nəticəsi yoxdur. 30 ilə yaxındır ki, bir santimetr torpaq bizə müzakirə yolu ilə qaytarılmadı: “Ona görə də mən tam haqlı olaraq dedim ki, bir halda ki, Minsk qrupu 1992-ci ildə formalaşdı, o zaman bu, hansı əsaslarda formalaşdı, bu haqda bizdə bir məlumat yoxdur. Əgər Minsk qrupunun tərkibinə baxsanız, görərsiniz ki, orada bu bölgədən uzaqlarda yerləşən, bu bölgə ilə heç bir əlaqəsi olmayan, münaqişə ilə heç zaman maraqlanmayan ölkələr də var. Onların Minsk qrupunda mövcudluğu formal xarakter daşıyır. Əgər biz bu münaqişənin həllini istəyiriksə, biz istəyirik, orada elə ölkələr olmalıdır ki, onların gücü də, təsiri də olsun və bu tərkib birtərəfli olmasın”.
Dövlətimizin başçısının müsahibəsindəki faktlar - beynəlxalq təşkilatların ədalətsiz yanaşmaları, ikili mövqe və riyakarlıqları Paris meriyasının qondarma “Dağlıq Qarabağ respublikası”nı tanımağa hazırlaşmasında özünü açıq şəkildə büruzə verdi. Araşdırmalar zamanı məlum oldu ki, Parisin meri qatı ermənipərəstdir. Hətta onun müavinlərindən biri ermənidir. O da məlum oldu ki, Fransanın meri, eyni zamanda, Paris Şurasına rəhbərlik edir. Bu şura 163 nəfərdən ibarətdir. Şurada Fransanın hazırkı prezidenti Emmanuel Makronun yaratdığı və rəhbərlik etdiyi “İrəli Fransa” partiyası geniş şəkildə təmsil olunur. Deməli, qondarma “Dağlıq Qarabağ respublikası”nın tanınmasına hazırlıq sifarişinin haradan və kimdən gəldiyi bəllidir.
Hər gün qələbə müjdəsi eşitməyimiz, 27 il işğal altında olan ərazilərimizin azad edilməsi Ermənistanın havadarlarını, ilk növbədə, münaqişənin tənzimlənməsində vasitəçilik edən Fransanı ciddi narahat etməyə başladı. Fransa prezidenti sanki vasitəçi olduğunu unutdu və beynəlxalq hüququn normalarına hörmətsizliyini açıq şəkildə büruzə verdi. Ümumiyyətlə, Fransanın dövlət başçıları hər zaman erməniləri dəstəkləyiblər. Bu baxımdan Emmanuel Makron da istisna deyil. Ancaq Makron sələflərindən irəli gedərək, işğalçı ölkəyə açıq dəstək verdi, O, sülhü yox, işğalı dəstəklədi və Fransanın Minsk qrupunda həmsədrliyini şübhə altına aldığını, Azərbaycanın ərazi bütövlüyünü dəstəkləyən beynəlxalq hüquqa hörmətsizliyini ört-basdır edə bilmədi.
Əslində, bu gün ATƏT-in Minsk qrupunun həmsədrlərinin vasitəçilik missiyasına ehtiyac qalmayıb. Çünki dövlətimizin başçısı bu qurumla yanaşı, digər mötəbər qurumların da 30 il ərzində həyata keçirə bilmədiklərini 44 gün ərzində yerinə yetirdi. Makron və onun həmfikirləri dərk etməlidirlər ki, Prezident, Ali Baş Komandan İlham Əliyevin dediyi kimi, “Tarixi ədalət bizim tərəfimizdədir. Çünki bu, bizim doğma dədə-baba torpağımızdır. Beynəlxalq hüquq bizim tərəfimizdədir. Bu gün Azərbaycan Ordusu öz torpağında Azərbaycanın ərazi bütövlüyünü qoruyur, müdafiə edir”.
Bölmənin digər xəbərləri
