İDMAN
Beynəlxalq Olimpiya Komitəsinin prezidenti taekvondo üzrə dünya çempionatı ərəfəsində Bakıya gələcək
![Beynəlxalq Olimpiya Komitəsinin prezidenti taekvondo üzrə dünya çempionatı ərəfəsində Bakıya gələcək](/files/2023/2/1200x630/16849330214696510779_1200x630.jpg)
Bakı 24 may, AZƏRTAC
Beynəlxalq Olimpiya Komitəsinin (BOK) prezidenti Tomas Bax Bakıda keçiriləcək taekvondo üzrə dünya çempionatı ərəfəsində Bakıya gələcək. BOK-un prezidenti çempionatın görüşlərini izləyəcək. Bu da ali qurumun Olimpiya hərəkatına göstərdiyi diqqətin bariz nümunəsidir.
Bu sözləri Azərbaycan Milli Olimpiya Komitəsinin vitse-prezidenti Çingiz Hüseynzadə AZƏRTAC-məxsusi müsahibəsində deyib.
MOK-un vitse-prezident qeyd edib ki, taekvondo üzrə dünya çempionatının Azərbaycanda keçirilməsi böyük hadisədir. Çempionat pandemiyadan sonra Azərbaycanda keçiriləcək ən böyük idman tədbiri olacaq. Ölkəmiz idmanın müxtəlif növləri üzrə dünya çempionatlarına ev sahibliyi edib. Taekvondo üzrə dünya çempionatında 145 ölkədən 1000-dən çox idmançını qarşılayıb-yerləşdirmək o qədər də asan məsələ deyil.
“Beynəlxalq Taekvondo Federasiyası ilə Azərbaycan Taekvondo Federasiyası uzun müddətdir birgə fəaliyyət göstərir və sıx əməkdaşlıq edir. Hesab edirəm ki, məhz bu səbəbdən taekvondo üzrə dünya çempionatı ölkəmizdə yüksək səviyyədə keçiriləcək. Azərbaycan idmançılarının bu yarışda yaxşı nəticələr qazanacaqlarını ümidvaram. Çünki məhz Bakıda keçiriləcək yarış Yay Olimpiya Oyunlarından əvvəl sonuncu dünya çempionatıdır. Bu mötəbər yarışda bütün idmançılarımıza uğurlar arzulayıram”, - deyə vitse-prezident əlavə edib.