Beynəlxalq təşkilatlar sərhədlərin delimitasiyası prosesinə dəstək verməlidir
Bakı, 26 may, AZƏRTAC
Azərbaycan-Ermənistan sərhədlərinin delimitasiya və demarkasiyası son günlərin ən aktual məsələlərindən biridir. Proseslər Ermənistanın bu məsələdə də süni əngəllər yaratdığını göstərir. Azərbaycan-Ermənistan sərhədlərinin delimitasiyasının bu günə qədər reallaşmamasına səbəb rəsmi İrəvanın işğalçılıq siyasəti olub. Beynəlxalq təşkilatlar sərhədlərin delimitasiyası prosesinə dəstək verməlidirlər.
Bu sözləri AZƏRTAC-a açıqlamasında Respublika Veteranlar Təşkilatının sədr müavini, polkovnik Cəlil Xəlilov bildirib.
C.Xəlilov vurğulayıb ki, sərhədlərimiz Azərbaycan Respublikasının dövlət suverenliyinin, ərazi hüdudlarını özündə birləşdirməklə, müstəqilliyimizin və suverenliyimizin mühüm atributlarından hesab olunur. Təəssüf ki, Ermənistanın 30 il işğal altında saxladığı, hazırda isə bir çox hissələri azad olunmuş Azərbaycan sərhədlərinin şəffaf əsaslarla bərpası, daha doğrusu, delimitasiyası və demarkasiyası erməni vandalları tərəfindən əsassız bəhanələrlə mübahisə predmetinə çevrilib. İyirmi birinci əsr olmasına baxmayaraq, bəzi erməni siyasətçiləri dövlətin suveren atributu olan sərhədlərin dəqiqləşdirilməsinin və ya ayrılmasının son dərəcə vacib və əhəmiyyətli olduğunu dərk etmək istəmirlər. Bu, həm də Ermənistanın özü üçün də mühüm əhəmiyyət kəsb edən məsələlərdən biridir. 1007 kilometr uzunluğu olan Azərbaycan-Ermənistan sərhədlərinin delimitasiyası son vaxtların ən aktual məsələlərindən biridir.
Bildirilib ki, 44 günlük Vətən müharibəsi və bu müharibə nəticəsində ordumuzun əldə etdiyi tarixi zəfər nəticəsində ərazi bütövlüyümüz təmin olunub. Bu da sərhədlərin delimitasiya və demarkasiyasını zəruri edir. Ancaq görünən odur ki, Ermənistan hər bir işdə olduğu kimi, bu məsələdə də süni problemlər və gərginliklər yaratmağa çalışır.
Polkovnik vurğulayıb ki, SSRİ dönəmindəki xəritə Azərbaycanla Ermənistan arasındakı sərhədlərin müəyyən edilməsində əsas götürülməlidir: “Azərbaycan-Ermənistan sərhədlərinin müəyyən olunmasında SSRİ dönəmində hazırlanan və sovet respublikaları arasındakı sərhədləri özündə əks etdirən xəritə əsas olmalıdır. Çünki bu xəritədə sərhədlər dəqiq şəkildə öz əksini tapıb və bu gün də sərhədlərin o xəritəyə əsasən müəyyən edilməsi həm tarixi, həm də hüquqi baxımdan daha ədalətlidir. Azərbaycan tərəfi də sərhədlərin məhz bu xəritə əsasında müəyyənləşməsində maraqlıdır”.
C.Xəlilovun sözlərinə görə, Azərbaycan digər ölkələrlə sərhədlərin delimitasiya məsələsini yüksək səviyyədə həyata keçirib. Ermənistan sərhədlərin delimitasiyası prosesini yanlış şərh edərək iddia edir ki, guya Azərbaycan tərəfi Ermənistan torpaqlarını ələ keçirməyə çalışır. Halbuki bu proses zamanı Azərbaycan beynəlxalq qanunları, sovet dönəmindəki xəritələri, Vətən müharibəsindən sonrakı razılaşmaları əsas tutaraq hərəkət edir.
Azərbaycan sərhədlərin delimitasiya prosesini digər qonşu dövlətlərlə də həyata keçirib. Azərbaycan-Rusiya sərhədlərinin delimitasiya prosesi bu baxımdan nümunə sayıla bilər. Bu proseslərin heç birində hər hansı gərginlik yaşanmayıb. Lakin Ermənistan tərəfi məqsədli şəkildə sərhədlərin delimitasiyası və demarkasiyası prosesini ləngitməyə, süni problemlər yaratmağa çalışır ki, bu da rəsmi İrəvanın məkrli niyyətindən xəbər verir.
Sədr müavini qeyd edib ki, beynəlxalq təşkilatlar da Azərbaycan-Ermənistan sərhədlərinin delimitasiyası prosesinə dəstək verməli, bu məsələdə yaxından iştirak etməlidir. Təəssüf ki, 30 ilə yaxın müddətdə davam edən erməni işğalı zamanı biz beynəlxalq təşkilatların işğalçı ölkəyə ciddi təzyiq və təsir göstərdiyinə şahid olmadıq. Halbuki BMT-nin işğalla bağlı dörd məlum qətnaməsi beynəlxalq birliyin Ermənistana təzyiqinə hər cür imkan yaradırdı. Qürur hissi ilə qeyd etməliyik ki, BMT qətnamələri məhz Azərbaycan Ordusu tərəfindən icra edilib. Düşmən işğal olunmuş ərazilərdən qovulub.
Bu gün aktual məsələ Azərbaycan-Ermənistan sərhədlərinin delimitasiya və demarkasiyasıdır. Beynəlxalq təşkilatlar heç olmasa bu prosesə dəstək verməli, sərhədlərin delimitasiyası prosesində Ermənistanın yaratdığı əsassız, süni əngəllərə görə rəsmi İrəvana təzyiq göstərməlidir. Hamı bilməlidir ki, bütün mübahisə və gərginliklər nə qədər tez ortadan qalxsa, regiona sülh və təhlükəsizlik də o qədər tez gələr. Bu isə bütün regionun maraqları, bu günü və gələcəyi baxımından son dərəcə əhəmiyyətlidir.
Bölmənin digər xəbərləri
