Bİ-Bİ-Sİ MONİTORİNQİN QAFQAZ BÜROSUNUN YENİ RƏHBƏRİ FƏALİYYƏTƏ BAŞLAMIŞDIR
AZƏRTAC xəbər verir ki, martın 1-də Müslüm Maqomayev adına Azərbaycan Dövlət Filarmoniyasında Bi-Bi-Si Monitorinqin Qafqaz bürosunun öz vəzifə müddətini başa vurmaqda olan rəhbəri xanım Ənn Tompsonun yola salınması və onu bu vəzifədə əvəz edəcək Tim Koinin təqdim edilməsi mərasimi olmuşdur.
Tədbirdə çıxış edən xanım Ənn Tompson 1997-ci ildə Azərbaycan hökumətinin köməyi ilə yaradılmış Bi-Bi-Si Monitorinqin Qafqaz bürosunun səkkiz ildə gördüyü işlərdən danışmış, onların fəaliyyət göstərmələrinə yardımçı olduqlarına görə ölkə rəhbərliyinə, Böyük Britaniyanın Bakıdakı səfirliyinə və digər qurumlara təşəkkürünü bildirmişdir.
Azərbaycanı çox sevdiyini, ölkəmiz haqqında çox müsbət təəssüratda olduğunu tədbir iştirakçılarının diqqətinə çatdıran Ənn Tompson Azərbaycanda olduğu səkkiz ildə onun sürətli inkişafının şahidi olduğunu söyləmişdir.
Sonra Bi-Bi-Si Monitorinqin Qafqaz bürosunun yeni rəhbəri Tim Koin tədbir iştirakçılarına təqdim edilmişdir.
Mərasimdə Milli Məclisin deputatları, dövlət qurumlarının, ictimaiyyətin, Azərbaycanda akkreditə olunmuş diplomatik korpusun və beynəlxalq təşkilatların ölkəmizdəki nümayəndəliklərinin təmsilçiləri iştirak etmişlər.
Bölmənin digər xəbərləri
