Bakı, 6 noyabr, AZƏRTAC

Binəqədi şosesində aparılan yenidənqurma işlərinin 2-ci mərhələsinə start verilib. Hazırda “Azəravtoyol” ASC tərəfindən yolun asfaltlanması işləri aparılır.

ASC-nin mətbuat xidmətindən AZƏRTAC-a bildirilib ki, yenidən qurulan yolun uzunluğu 2.6 kilometr təşkil edir. Layihə çərçivəsində yol 2 gediş və 2 gəliş olmaqla 4 hərəkət zolağı enində bərpa olunur. Hərəkət hissəsinin eni 15 metr və 1 metr enində boya ilə xətlənmiş ayırıcı zolaq da olmaqla yolun ümumi eni 19 metrdir.

Vətəndaşların yolun kənarı ilə rahat və təhlükəsiz şəkildə hərəkətini təmin etmək məqsədilə hər bir tərəfdə 1.5 metr enində yeni piyada səkiləri inşa olunur, kənarlarına isə 4600 poqonmetr yeni səki daşları düzülür.

Aparılan yenidənqurma işləri çərçivəsində yolun köhnə asfalt-beton örtüyünün üst qatı frezlənərək kənara daşınıb, yararsız qrunt çıxarılaraq əvəzinə yararlı material tökülərək kipləşdirmə işləri aparılıb və yeni yol əsası inşa olunub. Hazır olan hissələrə isə 2 qat olmaqla yeni asfalt-beton örtüyü döşənir. Ümumilikdə yolun 40 min kvadratmetrdən çox hissəsinin asfaltlanması nəzərdə tutulub.

Bundan başqa, avtobusların ümumi hərəkətə maneə yaratmadan dayanacaqlara giriş-çıxışını təmin etmək məqsədilə 6 yerdə “cib”li dayanacaqlar tikiləcək, avtomobillərin müvəqqəti dayanması üçün kiçik parkinq yerləri yaradılacaq, yolun hər bir tərəfində yeni işıq dirəkləri, hərəkətin normal təşkili üçün isə zəruri olan yerlərdə isə yol nişanları və məlumatverici lövhələr quraşdırılacaq, həmçinin yolun xətlənməsi işləri də aparılacaq.

Məlumata görə, yenidənqurma işlərinin 1-ci mərhələsində şose boyu bütün yeraltı kommunikasiya xətləri yenisi ilə əvəz olunub, bəziləri yoldan kənarlaşdırılıb, ətrafda yaşayan əhali tərəfindən, həmçinin sənaye və iaşə obyektlərindən yola doğru axıdılan məişət-çirkab sularının qarşısı alınıb.

Həmçinin, intensiv yağışlar zamanı yolun su ilə dolmasının qarşısını almaq üçün "4-cü qapı" küçəsi ilə kəsişmədə tullantı sularının axıdılması üçün nəzərdə tutulmuş kanalın suyunun Binəqədi şosesinin altından ötürülməsi məqsədilə, ötürmə qabiliyyətini itirmiş köhnə boru 35 metr uzunluğunda yeni boru ilə əvəz edilib, yol boyu yeni 2.8 kilometr uzunluğunda yağış kollektoru inşa olunub.

Yol səthindən yağış sularının kənarlaşdırılaraq kollektora yönəldilməsi üçün yolun hər bir istiqaməti üzrə 300 millimetrlik drenaj borular çəkilib və yağış barmaqlıqları quraşdırılıb.