Bakı, 24 may, AZƏRTAC

Mayın 24-də Qazax rayonunun Bağanıs Ayrım, Aşağı Əskipara, Xeyrımlı və Qızılhacılı kəndlərinin ərazilərinin Azərbaycan sərhədçiləri tərəfindən nəzarətə götürülməsi və bu ərazidə delimitasiya prosesində Azərbaycanın bir qarış torpağının belə Ermənistana güzəştə gedilməməsi, ilk növbədə, Prezident İlham Əliyevin prinsipial qələbəsidir. Bildiyimiz kimi, Azərbaycan Prezidenti hələ bu il yanvarın 10-da yerli televiziya kanallarına müsahibəsində bəyan etmişdi ki, “O kəndlər ki, anklav kəndlər deyil, həmin dörd kənd Azərbaycana qeyd-şərtsiz qaytarılmalıdır”. Yəni, siyasi iradə artıq aydın idi ki, Azərbaycan beynəlxalq hüquqa əsasən özünə məxsus olan bir qarış da olsun torpağı güzəştə getmək niyyətində deyil. Azərbaycan Prezidentinin ardıcıl hərbi-siyasi qələbələri fonunda Ermənistan və havadarları da yaxşı başa düşürdü ki, bu, Bakı üçün müzakirə mövzusu deyil.

Bunu AZƏRTAC-a açıqlamasında Milli Məclisin deputatı Bəhruz Məhərrəmov söyləyib.

“Bu mənada, Azərbaycanın yaratdığı hərbi-siyasi reallıqların nəticəsi olan 19 aprel tarixli razılığa müvafiq olaraq hər hansı hərbi məcburetmə tədbirlərinə ehtiyac duyulmadan 6,5 kvadratkilometr ərazinin azad edilməsi faktiki olaraq 2020-ci il 10 noyabr kapitulyasiya aktına müvafiq olaraq Ağdam, Kəlbəcər və Laçın rayonlarının Azərbaycana təhvil verilməsində Müzəffər Ali Baş Komandanın ehtiva olunan tarixi uğurunun heç də daha asan olmayan bir situasiyada təkrar olunması demək idi.

Ümumiyyətlə, məlumdur ki, delimitasiya və demarkasiya uzun sürən çox mürəkkəb bir prosesdir və Azərbaycanla uzun illər münaqişədə olmuş, 30 il ərazilərimizi işğalda saxlamış Ermənistanla isə delimitasiya və demarkasiya prosesinin daha çətin keçəcəyi sirr deyil. Lakin dövlət sərhədinin delimitasiyası və sərhəd təhlükəsizliyi məsələləri üzrə komissiyaların sayca 8-ci iclasında məhz Prezident İlham Əliyevin direktivlərinə uyğun müvafiq razılığa gəlinməsi, ardınca isə cəmi bir ay sonra Azərbaycan və Ermənistan arasında delimitasiya işləri nəticəsində 12,7 kilometr uzunluğunda sərhəd xətti müəyyən edilməsi həm də göstərir ki, bu bölgədə lider iradə həm də beynəlxalq hüququn aliliyini təmin edə bilib”, - deyə deputat bildirib.

Onun sözlərinə görə, eyni zamanda, Azərbaycan Prezidenti 10 may müsahibəsində həm də ifadə etmişdi ki, delimitasiya və demarkasiya prosesi Tovuz-Qazax bölgəsi istiqamətindən – hələ də işğalda qalan kəndlərimizdən başlanmalıdır. Bu gün reallaşan prosesin digər konseptual önəmi ondan ibarətdir ki, Azərbaycan və Ermənistanın arasında delimitasiyanın və hətta demarkasiyanın məhz əvvəlcə bu istiqamətdə faktiki olaraq yekunlaşması Ermənistan hakimiyyətinin Bakının beynəlxalq hüquqa əsaslanan bu mövqeyinin real mahiyyətini artıq başa düşdüyünü göstərir.

Bəhruz Məhərrəmov qeyd edib ki, rəsmi İrəvan üç il yarım sonra Bakının mövqeyinin hüquqi cəhətdən qanuni və ədalətli, praktiki cəhətdən isə səmərəli olmasını, situasiyanın Ermənistan üçün hər hansı formada təhdid yaratmadığını dərk edir: “Ümumiyyətlə, reallıqda da kəndlərimizin geri qaytarılması barədə ilkin razılıq elə bir situasiyadır ki, sağlam təfəkkürə malik heç bir subyekt bu prosesdə məğlub görünmür. Daha doğrusu, əgər Ermənistanda hansısa dairələr həmin kəndləri hələ də özününkü hesab edirsə, bu razılaşma həmin qüvvələrin ciddi məğlubiyyətidir. Əksinə, beynəlxalq hüquqa hörmətlə yanaşanlar isə özünün olmayan ərazilərə iddialardan könüllü surətdə əl çəkərək sağlam iradə nümayiş etdirməklə bu uğurdan pay götürə bilir. Aydındır ki, Azərbaycan hər hansı formada yeni hərbi gərginlik arzulamır, eyni zamanda, Prezident İlham Əliyev də dəfələrlə bu mövqeyi rəsmən bəyan edib”.