Birinci yarımillikdə Qax rayonu əhalisinin gəlirləri 38 milyon 515 min manata çatıb
Qax, 17 iyul (AZƏRTAC, Mustafa Dadaşov). İyulun 17-də Qax Rayon İcra Hakimiyyətində 2014-cü ilin birinci yarısının yekunları və qarşıda duran vəzifələrə həsr olunan yığıncaq keçirildi.
AZƏRTAC xəbər verir ki, hesabat məruzəsində ilin birinci yarısında rayonda iqtisadiyyatın əsas sahələri üzrə məhsul buraxılışının 39 milyon 663 min manat təşkil etdiyi qeyd olundu.
Bildirildi ki, 6 ayda 2,7 milyon manatlıq sənaye, 14,1 milyon manatlıq kənd təsərrüfatı məhsulları istehsal edilib, 6,8 milyon manatlıq tikinti işləri həyata keçirilib. Əhalinin gəlirləri ötən ilin eyni dövrü ilə müqayisədə 1 milyon 764 min manat artaraq 38 milyon 515 min manat olub. İlin birinci yarısında rayonda sahibkarlığın inkişafı və əhalinin məşğulluğunun təmini istiqamətində işlər davam etdirilib, Sahibkarlığa Kömək Milli Fondunun vəsaiti hesabına sahibkarlara 12 layihə üzrə 227 min manat güzəştli kredit verilib. Bu müddət ərzində rayonda 239 yeni daimi iş yeri açılıb.
Qeyd olundu ki, Azərbaycan Prezidentinin “Qax rayonun sosial-iqtisadi inkişafının sürətləndirilməsinə dair əlavə tədbirlər haqqında” 2013-cü il 21 avqust tarixli Sərəncamı ilə ayrılmış vəsait hesabına birinci yarımillikdə Qax şəhərinin bir prospekt və 5 küçəsində tikinti-təmir işləri aparılıb, həyət hasarlarının fasadı, evlərin dam örtüyü, küçə qapıları və darvazalar milli memarlıq üslubunda yenidən qurulub. Dövlətimizin başçısının digər Sərəncamı ilə ayrılmış vəsait hesabına hazırda 7 min nəfər əhalinin yaşadığı 8 yaşayış məntəqəsini birləşdirən Alatəmir-Marsan-Tasmalı-Zəyəm-Lələli avtomobil yolunun tikintisi davam etdirilir. Yolun üzərində uzunluğu 33 metr olan körpüdə tamamlanma işləri görülür.
Diqqətə çatdırıldı ki, hesabat dövründə rayonun Zərnə, Qapıçay, Qorağan və İlisu kəndlərində 2012-ci ilin mayında baş verən zəlzələ zamanı qəzalı vəziyyətə düşən uşaq bağçalarında bərpa-gücləndirilmə işləri başa çatdırılıb. Birinci yarımillikdə Qıpçaq kəndində həkim məntəqəsi, “Aqrolizinq” ASC-nin Qax rayon “Aqroservis” filialı üçün yeni bina, həmçinin Yaponiya hökumətinin qrant yardımı ilə Qax şəhərinin kənarında tullantıların yandırılması poliqonu tikilib istifadəyə verilib. Hazırda şəhərin 28 May küçəsində 100 yerlik yeni uşaq bağçasının tikintisi, şəhər 4 nömrəli tam orta məktəbində əsaslı təmir işləri davam etdirilir. İsmayıl Dağıstanlı küçəsində 100 yerlik daha bir uşaq bağçasının tikintisinə başlanılıb.
Hesabat məruzəsində qeyd olundu ki, ilin birinci yarısında yaşayış məntəqələrinin və əkin sahələrinin sel sularından mühafizəsi məqsədilə Kürmük çayı hövzəsində 141 metr uzunluğunda dəmir-beton və 78 metr uzunluğunda daş-beton bəndlər tikilib, mövcud bəndlərdə təmir işləri görülüb, çaylarda 365 min kubmetr həcmdə məcratəmizləmə işləri aparılıb. Dövlət meşə fonduna aid 30 hektar sahədə 35 mindən çox ağac əkilib.
Diqqətə çatdırıldı ki, hesabat dövründə rayonda 458 mənzil qazlaşdırılıb. Hazırda rayonda 15 min 567 ev təsərrüfatından 7 min 409-u, yəni 47,5 faizi, əhalinin isə 30 min 650 nəfəri, yəni 55,8 faizi təbii qazdan istifadə edir. İlisu və Şotavar kəndlərinin qazlaşdırılması davam etdirilir.
Yığıncaqda bildirildi ki, 2014-cü ilin birinci yarısında müvafiq qurumlar tərəfindən rayonda 347 ailəyə ünvanlı sosial yardım, 214 nəfərə əmək pensiyası təyin olunub. İyunda keçirilən sonuncu əmək yarmarkasında 51 nəfər müvafiq işlərə göndəriş əldə edib. Rayon telekommunikasiya qovşağında yeni avadanlığın quraşdırılması sayəsində sürətli internet istifadəçilərinin sayı 468 abonent artaraq 2645-ə çatıb.
Qeyd olundu ki, havaların uzun müddət quraq keçməsi taxılçılığa müəyyən ziyan vursa da, heyvandarlıq məhsulları, o cümlədən ət, süd və yumurta istehsalı ötən ilin müvafiq dövrü ilə müqayisədə artıb.
İclasda, həmçinin birinci yarımillikdə əhalinin elektrik enerjisi, içməli su və digər xidmətlərlə təminatının yaxşılaşdırılması istiqamətində görülən işlər ətraflı müzakirə olundu, qarşıda duran vəzifələrdən bəhs edildi.
Bölmənin digər xəbərləri
