WUF13: Bakı qlobal urbanizasiya gündəliyinin mərkəzinə çevrildi - ŞƏRH
Bakı, 25 may, AZƏRTAC
Bakı daha bir mötəbər beynəlxalq tədbirə yüksək səviyyədə ev sahibliyi edərək Ümumdünya Şəhərsalma Forumunun 13-cü Sessiyasını (WUF13) uğurla başa çatdırdı. WUF13 dünyanın müxtəlif ölkələrindən dövlət rəsmilərini, şəhərsalma üzrə mütəxəssisləri, memarları, investorları, alimləri və vətəndaş cəmiyyəti nümayəndələrini Azərbaycan paytaxtında bir araya gətirdi. Təxminən bir həftə davam edən tədbir qlobal urbanizasiya proseslərinin müzakirəsi, təcrübə mübadiləsi və yeni əməkdaşlıqların qurulması baxımından mühüm əhəmiyyət daşıdı.
Bunu AZƏRTAC-a açıqlamasında Milli Məclisin deputatı Sevinc Hüseynova deyib. O qeyd edib ki, WUF13-ün əsas mövzusu təhlükəsiz, dayanıqlı və inklüziv şəhərlərin formalaşdırılması idi: “Tədbir çərçivəsində müasir urbanizasiya problemləri, sürətli əhali artımının şəhərlərə təsiri, mənzil təminatı, iqlim dəyişiklikləri, ekoloji davamlılıq, rəqəmsal texnologiyaların şəhər idarəçiliyində rolu və “ağıllı şəhər” modelləri geniş şəkildə müzakirə edildi. Müxtəlif panel sessiyaları və təqdimatlar zamanı ekspertlər şəhərlərin gələcək inkişaf istiqamətləri ilə bağlı innovativ həll yollarını təqdim etdilər. Sözsüz ki, Bakının belə mötəbər tədbir üçün seçilməsi Azərbaycanın beynəlxalq aləmdə artan nüfuzunun göstəricisi kimi qiymətləndirilir. Son illərdə ölkədə həyata keçirilən iri infrastruktur layihələri, şəhərsalma sahəsində aparılan islahatlar və müasir urbanizasiya yanaşmaları beynəlxalq təşkilatlar tərəfindən diqqətlə izlənilir. Xüsusilə işğaldan azad edilmiş ərazilərdə həyata keçirilən genişmiqyaslı bərpa-quruculuq işləri forum iştirakçılarının böyük marağına səbəb oldu. Qarabağ və Şərqi Zəngəzurda tətbiq olunan “Ağıllı şəhər” və “Ağıllı kənd” konsepsiyaları dayanıqlı inkişafın nümunəsi kimi təqdim edildi”.
Deputat bildirib ki, WUF13 çərçivəsində təşkil olunan sərgilərdə müxtəlif ölkələrin şəhərsalma sahəsində nailiyyətləri nümayiş etdirilib: “Yeni texnologiyalar, ekoloji təmiz nəqliyyat sistemləri, yaşıl enerji həlləri və rəqəmsal idarəetmə modelləri iştirakçıların diqqətini çəkdi. Həmçinin şəhərlərin iqlim dəyişikliklərinə uyğunlaşdırılması və ekoloji təhlükəsizliyin təmin olunması məsələləri əsas müzakirə mövzularından biri oldu. WUF13 zamanı beynəlxalq əməkdaşlığın inkişafı istiqamətində də mühüm addımlar atıldı. Müxtəlif ölkələrin nümayəndələri arasında ikitərəfli görüşlər keçirildi, şəhərsalma və infrastruktur layihələri üzrə əməkdaşlıq imkanları müzakirə olundu. WUF13 Azərbaycanın beynəlxalq tərəfdaşlarla əlaqələrinin genişlənməsi və yeni investisiya imkanlarının formalaşması baxımından da əhəmiyyətli platforma rolunu oynadı”.
Sevinc Hüseynova vurğulayıb ki, tədbirin yüksək səviyyədə təşkili xarici qonaqlar tərəfindən xüsusi qeyd edilib: “Tədbir iştirakçıları Bakının müasir memarlığını, inkişaf etmiş nəqliyyat infrastrukturunu, təhlükəsizlik səviyyəsini və qonaqpərvərliyini yüksək qiymətləndirdilər. Şəhərin beynəlxalq tədbirlərin keçirilməsi üçün uyğun imkanlara malik olduğu bir daha təsdiqləndi. WUF13 yalnız şəhərsalma sahəsində deyil, həm də Azərbaycanın turizm potensialının tanıdılması baxımından mühüm rol oynadı. WUF13 çərçivəsində ölkəyə gələn qonaqlar Bakının tarixi və müasir simasını yaxından tanımaq imkanı əldə etdilər. Azərbaycanın zəngin mədəniyyəti, milli mətbəxi və tarixi irsi iştirakçılarda xoş təəssürat yaratdı”.
Deputat vurğulayıb ki, WUF13-ün yekun sənədi kimi qəbul edilən “Baku Call to Action” isə WUF13-ün ən mühüm nəticələrindən biri oldu. Sənəddə 176 ölkədən 58 mindən artıq iştirakçının qatıldığı və indiyədək keçirilmiş ən böyük Ümumdünya Şəhərsalma Forumu kimi tarixə düşən innovativ WUF13-ə uğurla ev sahibliyi etdiyinə, yüksək təşkilatçılıq və səmimi qonaqpərvərlik nümayiş etdirdiyinə görə Azərbaycan dövlətinə və xalqına xüsusi minnətdarlıq ifadə olundu. Eyni zamanda, tarixdə ilk dəfə olaraq ev sahibi ölkənin təşəbbüsü ilə keçirilən Liderlərin Bəyanatları Sessiyasında 27 dövlət və hökumət başçısının iştirak etməsi Forumun yüksək beynəlxalq siyasi nüfuzunun göstəricisi kimi qiymətləndirildi. “Baku Call to Action” sənədində Azərbaycanın təcrübəsi də daxil olmaqla, münaqişədən sonrakı bərpa və yenidənqurma sahəsində formalaşmış uğurlu beynəlxalq nümunələr xüsusi vurğulandı. Yenidənqurma və bərpa səylərinin prioritetləşdirilməsi, eləcə də məcburi köçkünlərin təhlükəsiz və ləyaqətli şəkildə öz doğma torpaqlarına qayıdışının təmin olunması məqsədilə əlaqələndirilmiş beynəlxalq yanaşmaya çağırış edildi. Sənəddə, həmçinin WUF13 çərçivəsində təqdim olunan mühüm yeniliklərdən biri kimi Bakı Şəhər Mükafatının təsis edilməsi qeyd olundu. Bununla yanaşı, münaqişə, müharibə və urbisidin məktəblər, xəstəxanalar, yaşayış evləri və digər mülki infrastruktur obyektlərinə, eləcə də ətraf mühit və biomüxtəlifliyə ciddi zərər vurduğu, milyonlarla insanın qaçqın və məcburi köçkün vəziyyətinə düşməsinə səbəb olduğu xüsusi vurğulandı. Bütün bunlar onu deməyə əsas verir ki, WUF13-ün Bakıda keçirilməsi Azərbaycanın qlobal urbanizasiya və dayanıqlı inkişaf gündəliyində fəal iştirakını nümayiş etdirdi. Bu mötəbər tədbir ölkənin beynəlxalq mövqeyinin möhkəmlənməsinə, yeni tərəfdaşlıqların qurulmasına və şəhərsalma sahəsində qabaqcıl təcrübələrin tətbiqinə mühüm töhfə vermiş oldu.
Beləliklə, WUF13 Azərbaycanın beynəlxalq tədbirlərin uğurlu təşkilatçısı kimi nüfuzunu bir daha təsdiqlədi və Bakının regionun aparıcı beynəlxalq platformalardan biri olduğunu nümayiş etdirdi”.
Müxbir - Göyçək Mahmudlu
Bölmənin digər xəbərləri
