Tural Gəncəliyev: “Bakı Fəaliyyətə Çağırış” Azərbaycanın böyük siyasi və diplomatik qələbəsidir
Bakı, 25 may, AZƏRTAC
Bakıda keçirilən Ümumdünya Şəhərsalma Forumunun 13-cü Sessiyasının (WUF13) yekun sənədini Azərbaycanın böyük diplomatik, siyasi qələbəsi hesab edirəm.
Bunu AZƏRTAC-a açıqlamasında Milli Məclisin deputatı Tural Gəncəliyev bildirib.
Onun sözlərinə görə, bu, BMT-nin Məskunlaşma Proqramı çərçivəsində keçirilən beynəlxalq tədbirdir və on minlərlə insanı - ekspertləri, dövlət nümayəndələrini və QHT təmsilçilərini bir araya gətirib.
“Yekun sənəddə xüsusilə Azərbaycanın postmünaqişə dövründə həyata keçirdiyi bərpa və yenidənqurma təcrübəsinin vurğulanması, məcburi köçkünlərin öz doğma torpaqlarına qayıdışı məsələsinin yer alması mühüm əhəmiyyət daşıyır. WUF13 göstərdi ki, müasir dünyada şəhərlərin, qəsəbələrin dağıdılması, insanların öz ev-eşiklərindən məhrum edilməsi faktlarının üzərindən sükutla keçmək mümkün deyil və bu, qəbuledilməzdir. Azərbaycanın işğal dövründə yaşadığı ağır dağıntılar, şəhər və kəndlərin darmadağın edilməsi, insanların öz yurdlarından didərgin salınması beynəlxalq ictimaiyyətin diqqətinə bir daha çatdırılıb. Azərbaycan ədaləti bərpa edərək torpaqlarını işğaldan azad etdi və şəhər, kənd və qəsəbələrimizi yenidən qurmağa başladı. Bu proses Azərbaycanın şəhərsalma mədəniyyətinin, resurslarının və idarəetmə qabiliyyətinin gücünü nümayiş etdirdi”, – deyə deputat bildirib.
O hesab edir ki, sənədin əsas mahiyyəti Azərbaycanın münaqişədən zərər çəkmiş tərəf kimi şəhərsalma sahəsində oynadığı rolun beynəlxalq səviyyədə tanınmasıdır. Eyni zamanda, dünyanın bir daha belə faciələrlə üzləşməməsi, şəhərlərin məqsədli şəkildə dağıdılması, urbisid adlandırılan bəşəriyyət əleyhinə cinayətlərin qəbuledilməz olduğu yekun sənəddə öz əksini tapdı. Vətəndaşlarımızın öz doğma torpaqlarına qayıdışı məsələsinin sənəddə yer alması Azərbaycanın şəhərsalma ənənələrinin və humanitar yanaşmasının mühüm göstəricisidir. Bu, vətəndaşların öz doğma torpaqlarına layiqli və təhlükəsiz şəkildə dönüş hüququnun təmin olunması baxımından da xüsusi əhəmiyyət daşıyır. WUF13 çərçivəsində qəbul edilən sənəd gələcəkdə tarixə düşəcək mühüm beynəlxalq sənədlərdən biri olacaq. Məhz Bakıda keçirilən 13-cü Sessiyada şəhərlərin məqsədli şəkildə məhv edilməsi məsələsi qlobal gündəmə gətirildi. Eyni zamanda, Azərbaycanın postmünaqişə dövründəki təcrübəsi dünyaya nümunə kimi təqdim olundu.
“Bu sənəd Azərbaycanın beynəlxalq nüfuzunun daha da artması baxımından da mühüm rol oynayır. Azərbaycan münaqişədən əziyyət çəkən ölkə olmaqla yanaşı, dünyaya konkret sübutlarla göstərdi ki, postmünaqişə bərpası sahəsində necə önəmli rol oynaya bilər. Biz şəhərlərimizi yenidən qurur, bərpa edir və vətəndaşlarımızın doğma torpaqlarına qayıdışını təmin edirik”, - deyə Tural Gəncəliyev əlavə edib.
Müxbir – Səbinə Əlizadə
Bölmənin digər xəbərləri
