BİRLƏŞMİŞ UNİVERSAL SƏHMDAR BANKI MƏTBUAT XİDMƏTİNİN MƏLUMATI
“Yeni Müsavat” qəzetinin 12 mart 2002-ci il tarixli nömrəsində verilmiş “Ağdamlılar narazıdırlar” sərlövhəli və “Şərq” qəzetinin 15 mart 2002-ci il tarixli nömrəsində dərc edilmiş “Çörək pulunun əziyyətləri” sərlövhəli yazılarla əlaqədar Birləşmiş Universal Səhmdar Bankının mətbuat xidməti aşağıdakıları bildirir:
Azərbaycan Respublikası Nazirlər Kabinetinin 20 avqust 2001-ci il tarixli 139 nömrəli qərarına və Azərbaycan Respublikası baş nazirinin müavininin yanında 4 sentyabr 2001-ci il tarixdə keçirilmiş iclasın protokoluna əsasən məcburi köçkünlərə yemək xərci üçün verilən aylıq müavinətlərin ödənilməsi onların məskunlaşdıqları ərazilərdə Birləşmiş Universal Səhmdar Bankın şəhər və rayon filialları tərəfindən həyata keçirilir.
Rayon icra hakimiyyətləri tərəfindən təqdim olunmuş adlı siyahılar əsasında bankın filialları aylıq müavinətlərin ödənilməsini vəsait daxil olduqdan sonrakı 5-6 iş günü ərzində təmin edirlər.
Ağdam rayonundan olan məcburi köçkünlərə yemək xərclərinin ödənilməsində müvəqqəti yaranmış gərginliyin əsas səbəbi isə, Birləşmiş Universal Səhmdar Bankı tərəfindən rayonun icra hakimiyyətinə dəfələrlə müraciət olunmasına baxmayaraq Bakı şəhərində məskunlaşmış, tərkibi 33 min nəfərdən yuxarı olan 8200 ailənin müvəqqəti yaşadıqları ərazilər üzrə adlı siyahısının BUS Bankın müvafiq rayon filiallarına bu günə kimi təqdim edilməməsidir.
Bankın rəhbərliyi tərəfindən məcburi köçkünlərin müavinətlərinin vaxtında ödənilməsi ciddi nəzarətə götürülmüş, bu istiqamətdə zəruri tədbirlər həyata keçirilir.
Bölmənin digər xəbərləri
