Bitki mühafizə vasitələri, gübrə istehsalçıları və idxalçıları ilə görüş keçirilib
Bakı, 6 aprel, AZƏRTAC
Aprelin 6-da Qida Təhlükəsizliyi Agentliyi bitki mühafizə vasitələri, gübrə istehsalçıları və idxalçıları ilə pestisidlərin və bioloji preparatların istehsalı, idxalı, ixracı, saxlanılması və satışı qaydaları ilə əlaqədar onlayn görüş keçirib.
Agentliyin İnformasiya təminatı və innovativ həllər şöbəsindən AZƏRTAC-a verilən məlumata görə, görüşdə Qida Təhlükəsizliyi Agentliyinin sədr müavinləri Rəşad Mafusov, Balarəhim Quliyev, agentlik yanında İctimai Şuranın üzvləri, eləcə də bitki mühafizə vasitələri, gübrə istehsalçıları və idxalçıları iştirak ediblər.
Qida Təhlükəsizliyi Agentliyinin sədr müavini Rəşad Mafusov ölkəmizdə bitki sağlamlığının təmin olunması, standartlara cavab verən yüksək keyfiyyətli məhsulların əldə edilməsi, həmçinin işğaldan azad olunmuş torpaqlarda zəngin bitki örtüyünün bərpası məsələlərini qarşıya qoyulan əsas vəzifələrdən biri olduğunu vurğulayaraq pestisidlərin və bioloji preparatların istehsalı, idxalı, ixracı, saxlanılması və satışı ilə əlaqədar qaydalara əməl olunmasının vacibliyini bildirib. Qeyd edilib ki, Nazirlər Kabinetinin 2007-ci il yanvarın 22-də verdiyi Qərardan irəli gələn tələblərə uyğun olaraq, qeydiyyatdan keçməyən, standartların və texniki şərtlərin tələblərinə cavab verməyən, mənşəyi məlum olmayan saxta və keyfiyyətsiz pestisidlərin idxalı cəhdləri yolverilməzdir. Bu sahədə sahibkarların maarifləndirilməsi üçün müvafiq tədbirlər həyata keçirilir.
Beynəlxalq təcrübəyə uyğun olaraq, bitki mühafizə vasitələri və gübrələrdə təsiredici maddələrlə bağlı mütəmadi araşdırmaların aparılması və təsiredici maddələrin qadağa siyahısının elmi əsaslarla əldə olunmuş nəticələrə uyğun olaraq yenilənməsi məsələləri də görüş iştirakçılarının diqqətinə çatdırılıb.
Bununla əlaqədar olaraq müvafiq qanunvericiliyə əsasən, Kənd Təsərrüfatı Nazirliyi, Ekologiya və Təbii Sərvətlər Nazirliyi, Səhiyyə Nazirliyi, Fövqəladə Hallar Nazirliyi və Qida Təhlükəsizliyi Agentliyinin mütəxəssislərindən ibarət “Pestisidlərin, bioloji preparatların və aqrokimyəvi maddələrin dövlət sınağının aparılması, qeydiyyata alınması və istifadəsinə icazə verilmiş preparatların siyahısına daxil edilməsi üzrə Ekspert Şurası” tərəfindən təsiredici maddələrlə bağlı aparılan elmi araşdırmaların nəticələri və beynəlxalq ekspertlərin rəyləri əsasında bir sıra təsiredici maddələr qadağa siyahısına əlavə olunub. Bu barədə idxalçı sahibkarlara məlumat verilib və xarici partnyorlar tərəfindən nəzərə alınması üçün onların əvvəlcədən məlumatlandırılması tövsiyə olunub. Qeyd edilib ki, qadağa siyahısı rəsmi prosedurlar başa çatdıqdan sonra ictimailəşdiriləcək.
Onlayn görüşdə bitki mühafizə vasitələri, gübrə istehsalçıları və idxalçılarının sualları cavablandırılıb, sahibkarlar tərəfindən səsləndirilən təkliflər qeydə alınıb və müvafiq tövsiyələr verilib.
Bölmənin digər xəbərləri
