BMT: Gender zəminində maaş fərqi aradan qaldırılmalıdır
Bakı, 18 sentyabr, AZƏRTAC
Sentyabrın 18-də qeyd olunan Beynəlxalq Bərabər Əməkhaqqı Günü eyni həcmdə görülən iş üçün bərabər əməkhaqqının əldə edilməsi istiqamətində uzunmüddətli səyləri təşviq edir. AZƏRTAC BMT-nin sayına istinadla xəbər verir ki, bu kontekstdə Birləşmiş Millətlər Təşkilatı insan hüquqlarına və ilk növbədə, qadınlara və qızlara qarşı ayrı-seçkiliyə qarşı hökumətlərin öhdəliklərinə əsaslanır.
BMT-nin müraciətində qeyd olunur ki, bütün regionlarda qadınlar kişilərə nisbətən daha az əməkhaqqı alırlar və gender zəminində maaş fərqi qlobal miqyasda təxminən 20 faiz qiymətləndirilir. İki cins arasında tarixi və struktur qeyri-bərabər güc münasibətlərinin davam etməsi, yoxsulluq və bərabərsizliklər, habelə qadınların və qızların imkanlarını məhdudlaşdıran resurslara və imkanlara çıxışda çatışmazlıqlara görə gender bərabərliyi və zərif cinsin nümayəndələrinin səlahiyyətlərinin artırılması təxirə salınmaqda davam edir. Bu boşluğun aradan qaldırılması istiqamətində irəliləyiş çox ləng gedir. Kişilər və qadınlar üçün bərabər əməkhaqqı geniş şəkildə təsdiq edilsə də, onun praktikada tətbiqi çətindir.
Müraciətdə qeyd edilir ki, Dayanıqlı İnkişaf Məqsədləri (SDG) gender bərabərliyinə və bütün qadınların və qızların səlahiyyətlərinin artırılmasına nail olmaq zərurətini ehtiva edir. Bundan əlavə, həmin sənəd gənclər və fiziki imkanları məhdud olan şəxslər də daxil olmaqla, bütün qadınlar və kişilər üçün tam və məhsuldar məşğulluq, layiqli iş axtarmaq imkanı və bərabər əməkhaqqını təşviq edir. Dayanıqlı İnkişaf naminə 2030-cu il Gündəliyinin həyata keçirilməsində gender perspektivinin ümumiləşdirilməsi mühüm əhəmiyyət kəsb edir.
BMT vurğulayır ki, bərabər əməkhaqqına nail olmaq insan hüquqları və gender bərabərliyi üçün mühüm mərhələdir. “Bu, bütün dünya ictimaiyyətinin birgə səyini tələb edir və görüləcək daha çox iş var. Birləşmiş Millətlər Təşkilatı, o cümlədən BMT-nin Beynəlxalq Əmək Təşkilatı (BƏT) üzv dövlətləri və vətəndaş cəmiyyətini, qadın və icma əsaslı təşkilatları və feminist qrupları, o cümlədən biznesləri, işçi və işəgötürən təşkilatlarını iş üçün bərabər ödənişi təşviq etməyə dəvət edir”, -deyə müraciətin sonunda bildirilir.
Bölmənin digər xəbərləri
