BOKSÇULARIMIZ DÜNYA KUBOKU YARIŞLARINA ZAQATALADA HAZIRLAŞIRLAR

31.08.2006 [10:43]
Çap et
A⁺ A^-

AZƏRTAC xəbər verir ki, Azərbaycanın boks üzrə yığma komandası oktyabrda Bakıda keçiriləcək dünya kuboku yarışlarına ciddi hazırlaşır.

Xatırladaq ki, turnirdə dünyanın ən güclü səkkiz komandası – Azərbaycan, Kuba, Rusiya, Çin, Qazaxıstan, Ukrayna, ABŞ, həmçinin Afrika qitəsi yığmalarının boksçuları yarışacaqlar.

Millimizin baş məşqçisi Məmməd Eyvazovun sözlərinə görə, hazırda Zaqatalada təlim-məşq toplanışlarını davam etdirən yığma komandanın heyətinə 17 boksçu cəlb edilmişdir.

Avtomobil qəzasından sonra uzun müddət rinqdən kənarda qalan Afina Yay Olimpiya Oyunlarının bürünc mükafatçısı Ağası Məmmədov da Zaqatalada komanda ilə birlikdə məşqlərə başlamışdır.

Sentyabrın ortalarında isə Çin yığmasının paytaxtımızda Azərbaycan boksçuları ilə birgə məşqlərdə iştirakı nəzərdə tutulmuşdur.