Bol məhsul, münasib qiymət - “Kənddən Şəhərə” yarmarkasından REPORTAJ
Bakı, 9 mart, AZƏRTAC
Koronavirus pandemiyası səbəbindən fəaliyyətində uzunmüddətli fasilə yaranmış “Kənddən Şəhərə” yarmarkaları bir aydan artıqdır ki, yenidən vətəndaşların xidmətindədir.
AZƏRTAC-ın əməkdaşı ötən həftəsonu yolunu Binəqədi rayonu, Süleyman Sani Axundov küçəsi 5B ünvanında təşkil olunan yarmarkadan salıb. Həm Novruz bayramı ərəfəsində kənd məhsullarının qiymətləri ilə tanış olub, həm də fermer və alıcılarla söhbət edib.
Yarmarka ərazisinə daxil olan zaman məhsulların bolluğu diqqətimizi çəkdi. Çərəz və quru meyvələr çoxluq təşkil edirdi. Piştaxtaların qarşısında alıcıların çox olması insanların Novruz hazırlığına başlamasından xəbər verir. İlk həmsöhbət olduğumuz fermer Şəhriyar Cəfərov da məhz çərəzlərin satışı ilə məşğuldur. Yetişdirdiyi məhsulları Zaqataladan gətirən fermer qiymətdə alıcılarla da razılaşır. “Satdığım məhsulların hamısını özümüz yetişdiririk. Quru meyvələri qurudub saxlayırıq. Bayramla əlaqədar satışım hər zamankından daha çox olur. Qiymətləri də münasib qoymuşam ki, alıcılar razı qalsınlar. Qozun qiyməti 4-6 manat arasında dəyişir, qoz ləpəsini isə 11-16 manata təklif edirəm. Fındıq 5-7, fındıq ləpəsi isə 12-15 manatdır. Gavalı qurusunu 2.5, alça qurusunu 3, alma qurusunu 3.5, innabı 3.5 manata satıram. Bəzən alıcılar qiymətdə bazarlıq edirlər. Mən də çalışıram onları razı salım, hansı məhsulu istəyirlərsə, təklif etdikləri qiymətə də satıram”, - deyə o bildirib.
Yarmarkadakı qiymətlərə ümumi nəzər salıb digər bir fermerə yaxınlaşırıq. Astara rayonundan gələn gənc fermer Ramin Əlizadə yarmarkaya bal, portağal, limon, naringi kimi məhsullar çıxarıb. Fermer əsas sahəsinin arıçılıq olduğunu, ancaq əlavə məşğuliyyət olaraq sitrus bağı saldığını və yetişdirdiyi məhsulları yarmarkaya gətirdiyini deyir: “Ailəm arıçılıqla məşğul olub deyə məndə uşaqlıqdan bu sahəyə maraq yaranıb. İndi arıçılıqla bərabər, həm də meyvəçiliklə məşğul oluram. Böyük sitrus bağım var. Gördüyünüz məhsullar da öz bağımdandır. Limonların qiyməti 0.3-0.5 manat arasında dəyişir, portağalı 1.8, balı isə 20-25 manata təklif edirəm. Pandemiya səbəbindən insanların bala tələbatı artıb. Ona görə də qiymətləri münasib etməyə çalışıram ki, hamı razı qalsın”.
Yarmarkada olduğumuz vaxt alıcılarla da həmsöhbət oluruq. Əli dolu yarmarkadan çıxan Vaqif Zeynalov qiymətlərdən razılığını bildirir: “Həftəlik alış-verişə gəlmişdik. Ancaq qiymətlərin münasib olduğunu görüb bayram üçün də tədarük gördük. Qiymətlər münasibdir. Məsələn, qoz ləpəsini digər yerlərdə 20-25 manata satırlar, burada isə 15 manata əlasını aldıq. Mövsümü meyvə və tərəvəzlər də burada digər yerlərlə müqayisədə daha münasibdir. Həm də burada elə fermerlər var ki, uzun müddətdir ondan məhsul alırıq. Aramızda qarşılıqlı inam yaranıb”.
Fikrini öyrəndiyimiz digər bir alıcı, Gülçöhrə nənə isə yarmarkaya ağartı məhsulları almaq üçün gəlib. “Uzun müddətdir ki, pendir və qatığı eyni fermerdən alıram. Hər həftəsonu Gədəbəydən bu yarmarkaya gəlir. Sağ olsun ki, məhsullarını qatqısız və təmiz satır. Bir xeyli vaxt yarmarka olmadı, o zaman fermerlər kimi biz də əziyyət çəkdik. Ağartı məhsulları elədir ki, hər adamdan almaq olmur. Həm təmizlik, həm də qiymət baxımından etibar etdiyin adamdan almaq daha yaxşıdır”, - deyə o qeyd edib.
“Kənddən Şəhərə” yarmarkaları Kənd Təsərrüfatı Nazirliyinin tabeliyində “Aqrar Tədarük və Təchizat” ASC tərəfindən təşkil olunur. Yarmarkalar hər həftəsonu Bakı və Abşeron ərazisində 3 fərqli ünvanda karantin rejiminin tələblərinə əməl olunmaqla fəaliyyət göstərir. Belə ki, fermerlər əvvəlcədən tibbi müayinədən keçirilir və ziyarətçilərin hərarətləri ölçüldükdən sonra yarmarka ərazisinə buraxılırlar. Həmçinin onlar tibbi ləvazimatlarla (tibbi maska, dezinfeksiyaedici maddələr, əlcək və.) da təmin olunurlar.
Xatırladaq ki, “Kənddən Şəhərə” yarmarkaları Binəqədi rayonundan başqa aşağıda qeyd olunan daha iki ünvanda da keçirilir:
- Nərimanov rayonu, Gənclik metro stansiyasının yanı
- Xırdalan şəhəri, Heydər Əliyev prospekti, 41A.
Bölmənin digər xəbərləri
