Bölgədə güc mərkəzinə çevrilən Azərbaycan regionda yeni kommunikasiyaların açılmasında maraqlıdır
Bakı, 22 may, Səadət Hakıyeva, AZƏRTAC
Nizami Gəncəvi Beynəlxalq Mərkəzi yarandığı səkkiz il ərzində dünyada mötəbər tribunaya çevirilməyi bacarıb. Artıq aparıcı beynəlxalq təsisatlardan birinə çevrilən Mərkəzin fəaliyyəti dünyada sülh, əməkdaşlıq, təhlükəsizlik və sabitlik işinə xidmət edir.
Bunu AZƏRTAC-a açıqlamasında Milli Məclisin deputatı, Yeni Azərbaycan Partiyasının İdarə Heyətinin üzvü Cavid Osmanov deyib.
C.Osmanov qeyd edib ki, pandemiya dövrü olmasına baxmayaraq, Nizami Gəncəvi Beynəlxalq Mərkəzi fəaliyyətini dövrün tələbləri çərçivəsində çox aktiv formada davam etdirir. Mayın 21-də Mərkəzin təşkilatçılığı ilə “Cənubi Qafqaz: Regional inkişaf və əməkdaşlıq perspektivləri” adlı müzakirələr keçirildi. Videoformatda keçirilən müzakirələrə Prezident İlham Əliyevin çıxış etməsi, həmçinin müxtəlif ölkələrdən olan ictimai, siyasi xadimlərin suallarını cavablandırması Azərbaycan həqiqətlərinin dünya ictimaiyyətinin diqqətinə çatdırılması baxımından mühüm əhəmiyyət kəsb etdi. Müzakirələri dinlədikcə postmüharibə dövründə proseslərin gedişatı və qarşıda duran hədəflər, əməkdaşlıqlar haqqında geniş məlumatlar əldə etmək mümkün oldu.
Deputat vurğulayıb ki, Azərbaycan Vətən müharibəsindəki parlaq Zəfərindən sonra regionda yeni reallıqlar yaradıb. Dünyanın inkişaf etmiş güclü dövlətləri və beynəlxalq təşkilatlar, siyasi mərkəzlər bu reallığı qəbul edərək ölkəmizlə əməkdaşlıq üçün təşəbbüslər irəli sürürlər. Azərbaycan beynəlxalq hüquq çərçivəsində öz haqqını bərpa edərək, bütün dünyaya güclü dövlət olduğunu göstərdi. Artıq Cənubi Qafqaz regionu dedikdə ağıla ilk gələn Azərbaycandır. Azərbaycan, sözün əsl mənasında, regionun güclü dövləti, başqa sözlə desək, yeni güc mərkəzidir. Prezident İlham Əliyevin həyata keçirdiyi düşünülmüş və uzaqgörən, eyni zamanda, qətiyyətli siyasət nəticəsində Azərbaycan dövləti bu uğurlara nail olmağı bacarıb.
Bildirilib ki, Azərbaycan Ermənistanla münaqişənin uzun müddət ərzində danışıqlar, sülh yolu ilə həllində maraqlı olub. Lakin Ermənistan işğalçılıq mövqeyində qalaraq 30 il ərzində tutduğu səhv yoldan çəkilmədi və bu səbəbdən də Azərbaycanla əməkdaşlıqdan, regional layihələrdən məhrum oldu. Bir sözlə, Ermənistanın işğalçılıq siyasəti bu ölkə üçün əks effekt verərək onu dalana çevirdi. Nəticə isə göz önündədir. Azərbaycan qalib ölkə olaraq gələcəyə baxır, regionda yeni kommunikasiyaların açılması üçün bir sıra layihələrin üzərində iş aparılır.
Qeyd edilib ki, Azərbaycanla 44 günlük müharibədən sonra bütün ordusu məhv olan Ermənistanda ictimai-siyasi gərnginlik səngimək bilmir. Gələcəyi qaranlıq olan bu ölkənin xilası isə revanş hissləri və işğalçılıq mövqeyindən əl çəkərək, yeni reallıqları qəbul etməsindən keçir. Azərbaycan Ermənistanla sülh razılaşması üzərində işə başlamağa hazırdır, bunun üçün sərhədlərin delimitasiyası mütləqdir. “Ermənistan Azərbaycan ərazilərini 30 il ərzində işğalda saxlamaqla yanaşı, həmin ərazilərimizdə dini, tarixi, mədəni, ekoloji terror aktları törədib, vandallıqlarından əl çəkməyiblər. Təbii ki, Ermənistan bütün bu cinayətlərinə görə beynəlxalq hüquq müstəvisində cavab verməli olacaq.
Azərbaycan dünya tarixində nadir qalib ölkələrdəndir ki, regionda sülh və təhlükəsizlik naminə Ermənistana qarşı bəzi humanist addımları atıb. Məsələn, Ermənistan tərəfindən əsir düşmüş, girov götürülmüş şəxslərlə Azərbaycanın insanlıq naminə davranışları, onların öz ölkələrinə geri göndərilmələri, Azərbaycanın Ermənistan vətəndaşlarına işğaldan azad olunan ərazilərdən keçərək Ermənistan şəhərlərini birləşdirən magistral yolun 21 kilometrindən istifadəyə icazə verməsi, Azərbaycanın Rusiya tərəfdə təmir işləri zamanı Rusiyanın “Qazprom” şirkətinə Azərbaycan ərazisindən Ermənistana təbii qaz nəqlinə icazə verməsi kimi halları qeyd etmək mümkündür”, - deyə C.Osmanov vurğulayıb.
Deputat təəssüflə qeyd edib ki, Ermənistan bütün bu humanist addımların qarşısında öz bədnam xislətindən əl çəkə bilmir. Haradasa bu məsələlərdə sadə erməniləri, erməni ictimaiyyətini bəlkə də qınamaq olmaz. Bu ölkədə yaşayanlar hakimiyyət hərisi olan siyasi dairələr və erməni lobbisinin əsirinə çevrilib düzgün qaydada yaşamaqdan məhrum olmuş adamlardır. Çünki Ermənistan təkcə Azərbaycan deyil, az qala bütün qonşularına qarşı ərazi iddiaları ilə çıxış edirlər. Bu ölkənin NATO üzvü olan Türkiyəyə qarşı ərazi iddialarının olması isə özlüyündə Ermənistanın cılız və gülünc durumda olmasından xəbər verir.
“Azərbaycanın humanist dövlət olması, eyni zamanda, regionda davamlı sülh və təhlükəsizlik naminə maraqlı olması, Ermənistanın revanşizm meyillərindən çəkilərək kommunikasiyaların açılmasına maraq göstərməsi bu ölkə üçün “xilas qapısını açılması” üçün son şans ola bilər. Xüsusilə, Zəngəzur dəhlizinin açılması region üçün mühüm əhəmiyyət kəsb edir. Bu dəhlizin açılması Ermənistan üçün də əlverişli olacaq, baxmayaraq ki, bu mövzuda Ermənistan hələdə siyasi manipulyasiyalar etməyə çalışır. Olsun ki, bunun da səbəbi hazırkı Ermənistan rəhbərliyinin keçiriləcək parlament seçkilərində siyasi dividentlər əldə edə bilmək cəhdləridir”, - deyə Cavid Osmanov qeyd edib.
Nizami Gəncəvi Beynəlxalq Mərkəzinin təşkil etdiyi “Cənubi Qafqaz: Regional inkişaf və əməkdaşlıq perspektivləri” adlı müzakirələrdə Prezident İlham Əliyevin səsləndirdiyi fikirlərin əsas istiqamətlərinin təbii ki, yuxarıda qeyd olunanları əhatə etdiyini, diskussiyalar zamanı müxtəlif mövzulara toxunulduğunu diqqətə çatdıran deputat deyib: “Ümumiyyətlə, Nizami Gəncəvi Beynəlxalq Mərkəzinin təşkil etdiyi “Cənubi Qafqaz: Regional inkişaf və əməkdaşlıq perspektivləri” adlı müzakirələr öz məhsuldarlığı ilə yadda qaldı, eyni zamanda, Azərbaycan həqiqətlərinin bir daha dünya ictimaiyyətinin diqqətinə çatdırılması üçün mühüm tribuna rolunu oynamış oldu”.
Bölmənin digər xəbərləri
