Qış mövsümü Avropada təbii qazın qiymətlərinin artması müşayiət olunacaq
Bakı, 21 avqust, AZƏRTAC
ABŞ Prezidenti Donald Trampın İrana qarşı kəskin iqtisadi müharibəyə başlayacağını bəyan etməsi və İran rəsmilərinin buna cavab olaraq daha güclü və uzaqmənzilli raketlərdən istifadə edəcəklərini bildirməsi enerji bazarında növbəti qiymət artımına gətirib çıxarıb.
AZƏRTAC xəbər verir ki, neft qiymətlərinin ardınca təbii qazın qiyməti də artıb. Niderlandın TTF habında qazın 1000 kubmetrinin qiyməti martın 19-dan etibarən ilk dəfə olaraq 800 dollara yüksəlib. ABŞ ilə İran arasında hərbi əməliyyatların başladığı gündən dünya bazarında qazın qiymətinin artmasının əsas səbəbi Yaxın Şərqdə mayeləşdirilmiş təbii qaz (LNG) ixrac edən ölkələrin – Səudiyyə Ərəbistanı və Qətərin qaz sənayesi infrastrukturunun İranın raket zərbələrinə məruz qalması olub.
Bu ilin yay mövsümü də Avropada həddən artıq isti keçir. Bu da qazla işləyən elektrik stansiyalarının yüklənməsinə səbəb olub. Nəticədə əlavə qazı anbarlara vurmaq əvəzinə qazla işləyən elektrik stansiyalarına yönəldilir.
“Euronews”un verdiyi məlumata görə, avqustun 19-na olan məlumata əsasən Avropanın qaz anbarları cəmi 61,40 faiz doldurulub ki, bu da qışa hazırlığın zəif olduğunu göstərir. İlin əvvəlindən Avropa ölkələrində qaz istehlakı 15 faiz azalıb. Buna baxmayaraq, anbarları doldurmaq üçün hələlik kifayət qədər qaz yoxdur.
“Oxford Economics”in hesabatına görə, cari ilin ikinci yarısında dünya bazarında qazın qiyməti 3,5 faiz artacaq. Hesabatda qeyd olunub ki, qarşıdakı qış mövsümü Avropada qiymətlərin artması və ev təsərrüfatlarında qaz çatışmazlığı ilə müşayiət olunacaq.
Bölmənin digər xəbərləri
