CƏMİYYƏT
BÖLGƏLƏRİN İNKİŞAFI ÜÇÜN
İqtisadi inkişaf, maliyyə, vergilər, yanacaq və energetika, əhalinin sosial müdafiəsi nazirliklərinin və Milli Bankın mütəxəssisləri 2005-ci ilədək bölgələrin inkişafına dair dövlət proqramını hazırlamağa başlamışlar.
Əsas diqqət sərhədyanı rayonlara və Naxçıvan Muxtar Respublikasına yönəldiləcəkdir. İnvestisiya siyasəti, infrastrukturun inkişafı, iş yerlərinin artırılması, kiçik və orta biznesin inkişafı proqramın başlıca cəhətləridir.
Üç aydan sonra proqram layihəsi müzakirə üçün Nazirlər Kabinetinə təqdim olunacaqdır.
Bu dövlət sənədi ilə yanaşı, BMT-nin İnkişaf Proqramı özünün “Kiçik və orta özəl müəssisələrə yardım” layihəsi çərçivəsində cari ilin birinci yarısında kiçik və orta biznesə yardım üçün Regional informasiya mərkəzi yaratmaq fikrindədir. Layihənin texniki məsləhətçisi Atena Dyukoyun sözlərinə görə, mərkəzin yaradılması qısa müddətdə ölkənin müxtəlif bölgələrində sahibkarlara texniki yardım göstərməyə imkan verəcəkdir.