Bolqarıstan hökuməti fermerlərin etiraz aksiyalarına hazırlaşır
Bakı, 18 sentyabr, AZƏRTAC
Bolqarıstan hökuməti Ukraynadan kənd təsərrüfatı məhsullarının idxalına icazə verilməsi ilə bağlı parlament qərarının ləğvini tələb edən fermerlərin kütləvi etirazlarına hazırlaşır.
AZƏRTAC xəbər verir ki, bunu Bolqarıstanın Baş nazir Nikolay Denkov Sofiyada keçirilən brifinqdə bildirib.
“Hökumət kənd təsərrüfatı istehsalçılarını təmsil edən təşkilatların nümayəndələri ilə dialoqa hazırdır. Etirazçıların əsas problemi həllini tapıb - bəzi məhsulların ixracına məhdudiyyətlər tətbiq olunması barədə Ukrayna ilə razılıq əldə olunub”, - deyə Nikolay Denkov bildirib.
Hökumət başçısının sözlərinə görə, etirazçılar dialoq dəvətini rədd edir. “Onlar bizimlə konstruktiv dialoqa hazır olsalar, hər an müzakirəni davam etdirə bilərik”, - deyə Baş nazir vurğulayıb.
Qeyd edək ki, sentyabrın 14-də Bolqarıstan parlamenti Ukraynadan taxıl idxalına icazə verilməsi barədə qərar qəbul edib. Bunu “milli maraqlara xəyanət” adlandıran fermerlər bazar ertəsi günü sərhəd keçidlərini və əsas yolları bağlamaq, ertəsi gün isə Sofiyada genişmiqyaslı aksiya keçirmək niyyətindədir.
Bölmənin digər xəbərləri
