Bolqarıstanda Xocalı soyqırımı qurbanlarının xatirəsi anılmışdır
Bakı, 26 fevral (AZƏRTAC). Azərbaycanın Bolqarıstandakı səfirliyi Bolqarıstan Respublikası ehtiyatda olan zabitlər birliyinin Sofiyadakı nümayəndəliyində Xocalı soyqırımının 21-ci ildönümü ilə bağlı tədbir keçirmişdir.
Səfirlikdən AZƏRTAC-a bildirilmişdir ki, səfir Emil Kərimov Dağlıq Qarabağ həqiqətləri, tarixi faktlar, erməni təcavüzü və bu təcavüzün ağır nəticələri, münaqişə ilə bağlı BMT Təhlükəsizlik Şurasının, Avropa Şurasının və İKT-nin müvafiq qətnamələri barədə məlumat vermişdir. Qeyd edilmişdir ki, Ermənistan indiyədək bu qətnamələrə əməl etmir.
E.Kərimov, həmçinin XX yüzilliyin ən dəhşətli hadisələrindən biri olan 1992-ci il fevralın 25-dən 26-na keçən gecə Xocalı şəhərində xalqımıza qarşı törədilmiş faciədən söz açmışdır. Vurğulanmışdır ki, 1994-cü ildə ümummilli liderimiz Heydər Əliyevin rəhbərliyi ilə dövlətimiz tərəfindən bu faciəyə siyasi-hüquqi qiymət verilmişdir.
E.Kərimov, həmçinin Xocalı faciəsinə beynəlxalq aləmdə siyasi-mənəvi və hüquqi qiymət verilməsi və beynəlxalq aləmdə tanınması üçün İslam Konfransı Təşkilatının Gənclər Forumunun mədəniyyətlərarası dialoq üzrə baş əlaqələndiricisi Leyla xanım Əliyevanın təşəbbüsü ilə yaradılmış “Xocalıya ədalət!” beynəlxalq məlumat və təşviqat kampaniyası barədə də məlumat vermişdir.
Sonra “Lider” televiziyası tərəfindən hazırlanmış “Məhv edilmiş şəhər” adlı sənədli film nümayiş etdirilmişdir.
Daha sonra tədbir iştirakçılarını Ermənistan-Azərbaycan, Dağlıq Qarabağ münaqişəsi ilə bağlı maraqlandıran suallar cavablandırılmışdır.
Sonda qonaqlara Dağlıq Qarabağ həqiqətlərini, Xocalı soyqırımını əks etdirən kitablar, jurnallar, broşürlər, press-relizlər, disklər paylanılmışdır.
Azərbaycanın Bolqarıstandakı səfirliyində də Xocalı faciəsi ilə bağlı anım mərasimi keçirilmişdir.
Mərasimdə Bolqarıstanın ictimaiyyətinin nümayəndələri, həmvətənlərimiz iştirak etmişlər.
Səfir E.Kərimov Xocalı faciəsi barədə ətraflı məlumat vermiş və faciəyə yalnız ümummilli lider Heydər Əliyevin rəhbərliyi dövründə hüquqi-siyasi qiymət verildiyini bildirmiş, qeyd etmişdir ki, Xocalı soyqırımı bütün bəşəriyyətə qarşı yönəldilmiş tarixi bir cinayətdir.
Xocalı faciəsi ilə bağlı səfirlik tərəfindən hazırlanmış müvafiq press-relizlər Bolqarıstanın dövlət və özəl strukturları, bu ölkədə akkreditə olunmuş diplomatik korpus və beynəlxalq təşkilatların nümayəndəliklərinə göndərilmişdir.
Bölmənin digər xəbərləri
