“Borussiya” erməni legioneri böyük ehtimalla Bakıya gətirməyəcək
Bakı, 19 oktyabr, Elşad Qəzvini, AZƏRTAC
Azərbaycan tərəfinin Dortmundun “Borussiya” komandasında forma geyən erməni legioner Henrix Mxitaryanın UEFA Avropa Liqasının qrup mərhələsi çərçivəsində “Qəbələ” ilə oyun üçün Bakıya gələcəyi təqdirdə onun təhlükəsizliyinə təminat verməsinə baxmayaraq, alman klubunun rəhbərliyi ehtiyatlı addım atmağa qərar verib.
AZƏRTAC Almaniyanın “Kicker və Sport1” idman portalına istinadla xəbər verir ki, “Borussiya” H.Mxitaryanı “Qəbələ” ilə oktyabrın 22-də keçiriləcək oyuna gətirməyəcək.
Almaniya klubunun idman direktoru Hans-Yoaxim Vatzke bunu siyasi amillə və erməni əsilli yarımmüdafiəçinin təhlükəsizliyini təmin etmək məqsədilə əlaqələndirib. “Böyük ehtimalla Mxitaryan komanda ilə Bakıya yollanmayacaq. Çünki klub rəhbərliyi ehtiyatlanaraq futbolçunun təhlükəsizliyinə tam təminat verə bilmir. Mxitaryanın vətəni Ermənistan ilə Azərbaycan arasında münaqişə mövcuddur və klub olaraq idman yarışının siyası gərginliyə yönəlməsinin əleyhinəyik” - deyə idman direktoru qeyd edib.
Bölmənin digər xəbərləri
