BÖYÜK VƏTƏN MÜHARİBƏSİ ƏLİLLƏRİNƏ PULSUZ MİNİK AVTOMOBİLLƏRİ VERİLMİŞDİR
AZƏRTAC xəbər verir ki, yanvarın 14-də Əmək və Əhalinin Sosial Müdafiəsi Nazirliyində bir qrup Böyük Vətən müharibəsi əlilinə “OKA” markalı minik avtomobillərinin verilməsi ilə bağlı mərasim keçirilmişdir.
Nazir Əli Nağıyev veteranları təbrik edərək, Böyük Vətən müharibəsi əlillərinə minik avtomobilləri verilməsinin təşəbbüsçüsünün məhz ümummilli liderimiz Heydər Əliyev olduğunu xatırlatmışdır. O, Azərbaycan Prezidenti İlham Əliyevin bu ənənəyə sadiq qaldığını bildirərək, bu il 40 nəfər Böyük Vətən müharibəsi əlilinə minik avtomobillərinin verilməsini onlara diqqət və qayğının davam etməsinin bariz nümunəsi kimi səciyyələndirmişdir.
Ə.Nağıyev demişdir ki, əlillərin nəqliyyat vasitələrinə olan ehtiyaclarını ödəmək məqsədi ilə nazirlik tərəfindən 1997-ci ildən bəri 1220-dək “OKA” avtomobili alınmış, onların 137 ədədi Böyük Vətən müharibəsi əlillərinə ayrılmışdır. Builki avtomobillərin 33-ü Bakıdan, 7-si isə Naxçıvan MR-dən olan Böyük Vətən müharibəsi əlillərinə verilmişdir.
Mərasimdə çıxış edən veteranlar bu sevinci, fərəhi onlara bəxş edənlərə, ümummilli liderimiz Heydər Əliyev tərəfindən təməli qoyulmuş sosial-iqtisadi siyasəti müvəffəqiyyətlə həyata keçirən Prezident İlham Əliyevə, habelə Əmək və Əhalinin Sosial Müdafiəsi Nazirliyinə minnətdarlıqlarını bildirmişlər.
Böyük Vətən müharibəsi əlilləri Azərbaycan Prezidenti İlham Əliyevə müraciət qəbul etmişlər. Müraciətdə deyilir:
- “Möhtərəm İlham Heydər oğlu!
Tarix boyu xalqımızın qarşısında duran vəzifə milli təfəkkürə əsaslanan müstəqil Azərbaycan dövləti qurmaqdan ibarət olub. Belə bir dövlətin qurulması isə yalnız zəngin təcrübə ilə milli şüurun üzvi surətdə birləşməsi, dövlətçilik məfkurəsinin daşıyıcısı olan liderin hakimiyyətə gəlməsi sayəsində mümkün idi. Xalqımız haqlı olaraq, müasir dövlət quruculuğumuzun başlanğıcını ümummilli liderimiz Heydər Əlirza oğlunun hakimiyyətə gəldiyi andan qeyd edir.
Xalqımızı tarixin amansız dönəmlərindən uğurla keçirib yaşadan, inkişafa istiqamətləndirən bu böyük şəxsiyyətin strateji inkişaf konsepsiyası sayəsində müstəqil Azərbaycan qloballaşan dünyada öz layiqli yerini tutaraq, möhkəmlənməkdə və getdikcə regionun böyük perspektivləri olan dövlətinə çevrilməkdədir. Məhz Heydər Əlirza oğlunun yürütdüyü məqsədyönlü siyasət nəticəsində cəmiyyətin bütün sahələrinin inkişafına nail olmaq üçün demokratik islahatlar aparıldı, ölkədə dünyəvi vətəndaş cəmiyyətinin formalaşmasına geniş imkanlar yaradıldı.
Dahi rəhbərimizin qurub-yaratdığı, hər cür daxili və xarici təhlükələrdən qoruyub saxladığı və inkişaf etdirdiyi dövlətimizin böyük diplomatiya və beynəlxalq münasibətlər məktəbi keçmiş və artıq özünü siyasi lider kimi təsdiq etmiş, xalqına və Vətəninə son dərəcə sədaqətli şəxsiyyət tərəfindən idarə edilməsi gələcək uğurlarımıza, yeni nailiyyətlərimizə ən böyük zəmanətdir.
Cənab Prezident!
Ötən əsrin ən ağır və dəhşətli müharibələrindən olan Böyük Vətən müharibəsinin iştirakçıları, sözün əsil mənasında, qəhrəmanlıq salnaməsi yaratmaqla yer üzündə sülh və ədalət naminə vuruşub qələbə qazandılar. Bu qələbə faşizmin kökünü kəsməklə planetimizin xalqlarını bəşəriyyətin qəddar düşmənindən xilas etdi. Digər tərəfdən, bu müharibə inandırıcı şəkildə sübut etdi ki, ədalətsiz və işğalçılıq müharibələri məğlubiyyətə məhkumdur.
Təəssüflər olsun ki, milyonlarla insanın qanı ilə yazılmış tarixi yenidən yazmağa, böyük qələbənin əhəmiyyətini şüurlardan çıxarmağa çalışanlar da oldu. Məhz ümummilli liderimiz Heydər Əliyevin yenidən hakimiyyətə qayıdışından sonra xalqın qəhrəmanlığını gözdən salmaq cəhdlərinə son qoyuldu, Azərbaycan əsgərlərinin göstərdiyi rəşadətə xalqımızın milli-mənəvi sərvəti kimi qiymət verildi, bu insanlar ”Azərbaycan xalqının qızıl fondu” adlandırıldı.
Zati-aliləri!
Bu gün Azərbaycanın müharibə və silahlı qüvvələr veteranları dövlətin hərtərəfli qayğısı ilə əhatə olunublar. Sağlamlığımızın qorunması üçün Əmək və Əhalinin Sosial Müdafiəsi Nazirliyi tərəfindən Şağanda geniş imkanlara malik müalicə pansionatının bizim istifadəmizə verilməsi, müntəzəm olaraq tibbi reabilitasiya vasitələri, hər il olduğu kimi, bu il də pulsuz minik avtomobilləri ilə təmin edilməyimiz məhz Heydər Əlirza oğlunun təməlini qoyduğu qayğının bariz nümunəsidir.
Sizin sərəncamınızla Böyük Vətən müharibəsində qələbəmizin 60-cı ildönümü ilə əlaqədar görülən tədbirlər isə bu müharibənin ağrısını-acısını yaşamış, fiziki sağlamlıqlarını itirmiş, həmin qanlı-qadalı illərin nişanələrini özü ilə gəzdirən ağsaqqallara hörmət və ehtiramın əyani sübutudur.
Cənab Prezident!
Bu gün xalqımızın qarşısında ərazilərimizin erməni təcavüzündən xilas edilməsi, ölkəmizin müdafiə qabiliyyətinin daha da möhkəmləndirilməsi kimi məsul vəzifə durur. Əmin ola bilərsiniz ki, gəncliyini və bütün ömrünü Vətəninin, xalqının azadlığına və firavanlığına həsr etmiş, həyatı və döyüş yolu hər kəs üçün örnək ola biləcək bu insanlar, “Azərbaycan xalqının qızıl fondu” adına layiq olaraq, respublikanın ictimai-siyasi həyatında, xüsusilə gənclərin hərbi vətənpərvərlik tərbiyəsində bundan sonra da əzmlə iştirak edəcəklər.
Tanrı Sizi qorusun!
Böyük Vətən müharibəsi əlilləri:
Bəhlul Abbasov
Fikrət Fikrətli
İsfəndiyar Paşayev
Məhəmmədəli İsmayılov
və başqaları, cəmi 33 imza.”
Bölmənin digər xəbərləri
