İQTİSADİYYAT
bp ŞİRKƏTİ BAKI-CEYHAN BORU KƏMƏRİNİN TİKİNTİSİNƏ 500 MİLYON DOLLAR AYIRMAĞA HAZIRDIR
Bu məlumatı müxbirimizə bp-Azərbaycan şirkətinin prezidenti Devid Vudvord vermişdir. O vurğulamışdır ki, kredit kommersiya banklarında olduğu kimi, eyni şərtlərlə ayrılacaqdır.
Xatırladaq ki, kredit ayıran və əsas ixrac boru kəməri layihəsini həyata keçirən təşkilatlar dörd qrupa bölünürlər. Birinci qrupa Avropa Yenidənqurma və İnkişaf Bankı ilə Beynəlxalq Maliyyə Korporasiyası daxildir. Onlar öz vəsaitini ayıracaq, habelə kommersiya banklarının kreditləri üçün zəmanət verəcəklər. İkinci qrupa ixrac-kredit agentlikləri aiddirlər. Onlar ABŞ, Böyük Britaniya, Yaponiya, Almaniya, İtaliya və Fransadan material və avadanlıq alınmasını maliyyələşdirmək üçün kommersiya banklarına zəmanət verəcəklər. Üçüncü qrup kommersiya banklarından (onların sayı 10-dan 30-dəkdir), dördüncü qrup isə iri kreditçi şirkətlərdən, o cümlədən bp və “Statoyl”dan ibarətdir.