BRAZİLİYA 2014-CÜ İLDƏ FUTBOL ÜZRƏ DÜNYA ÇEMPİONATINA EV SAHİBLİYİ EDƏCƏK
AZƏRTAC-ın xüsusi müxbiri Beynəlxalq Futbol Federasiyaları Assosiasiyasının (FİFA) rəsmi saytına istinadla bildirir ki, FİFA İcraiyyə Komitəsinin oktyabrın 30-da İsveçrənin Sürix şəhərindəki qərargahında keçirilən iclasında 2011-ci ildə qadınlar, 2014-cü ildə isə kişilər arasında keçiriləcək futbol üzrə dünya çempionatına ev sahibliyi edəcək ölkələri müəyyənləşdirmişdir. Qitələrarası növbəli prinsip əsasında Cənubi Amerikanın son mərhələdə yeganə namizədi olan Braziliya 20-ci futbol üzrə dünya çempionatını öz ölkəsində keçirmək hüququ qazanmışdır.
Braziliya 1950-ci ildəki dünya çempionatından sonra ikinci dəfə dünya çempionatına ev sahibliyi edəcəkdir. Beş dəfə (1958, 1962, 1970, 1994 və 2002-ci illər) dünya çempionu titulunu qazanan Braziliya indiyədək keçirilmiş bütün dünya çempionatlarının yekun mərhələsinə vəsiqə əldə etmiş yeganə ölkədir.
2018-ci ildən sonra isə dünya çempionatına ev sahibliyi edəcək ölkə seçimində qitələrarası rotasiya prinsipinə son qoyulacaqdır.
2011-ci ildə qadınlar arasında dünya çempionatı isə ikiqat dünya çempionu Almaniyada keçiriləcəkdir.
Bölmənin digər xəbərləri
