BRİTANİYA BİZNESMENİ VƏ SİYASƏTÇİSİ QƏBUL EDİLMİŞDİR
Lord Feyrfaks ona göstərilən diqqət üçün təşəkkürünü bildirərək, başçılıq etdiyi şirkətin - dünyada ən iri broker sığorta holdinq qruplarından biri olan təşkilatın fəaliyyətindən respublika prezidentinə ətraflı danışmışdır. Keçmiş ittifaq respublikaları ilə iş sahəsində on ildən çox təcrübəsi olan “Secvik Marin”in başçısı Azərbaycana ilk dəfərdir gəlir. Bir milyard funtsterlinq sərmayəsi olan və 15 min adamın çalışdığı şirkət hazırda Moskvada və Qazaxıstanda öz nümayəndəliklərinə malikdir.
Nikolas Feyrfaks sözünə davam edərək demişdir: “Mən Bakıda çox səmimi qarşılandım, burada sığorta xidmətləri bazarı yaratmaq istəyən çox adamla söhbət etdim. Ümidvaram ki, biznesimiz Azərbaycanda müvəffəqiyyətlə baş tutacaq və biz burada da şirkətimizin nümayəndliyini açacağıq”.
Heydər Əliyev qonağa “Secvik Marin” şirkətinin fəaliyyəti barədə ətraflı məlumata görə təşəkkürünü bildirmiş və xüsusi qeyd etmişdir ki, sığorta işi Azərbaycan üçün nisbətən yeni və axıradək öyrənilməmiş olan sahədir. O demişdir: “Əlbəttə, biz sığorta işini inkişaf etdirməliyik. Lakin bu işi bacarıqla və peşəkarlıqla görmək lazımdır”. Söhbətin sonunda respublika Prezidenti ümidvar olduğunu bildirmişdir ki, lord Feyrfaks öz mövqeyindən və nüfuzundan istifadə edərək, Azərbaycana başqa məsələlərdə də kömək göstərə biləcəkdir.
Qəbulda xarici siyasət məsələləri üzrə dövlət müşaviri Vəfa Quluzadə iştirak etmişdir.
Aslan Aslanov
AZƏRTAC-ın müxbiri
Bölmənin digər xəbərləri
